Jyl qorytyndysy: Elimizde 240 myńnan asa belsendi volonter bar

<p>QR Mádenıet jáne aqparat mınıstrligi Prezıdenttiń belsendi azamattyq qoǵamdy qalyptastyrý jónindegi tapsyrmalaryn oryndaý jumysyn qorytyndylady, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

«Osy oraıda birqatar zańnamalyq bastamalar ázirlenip, qabyldandy. Olardyń qatarynda memlekettik baqylaýǵa balama qurýǵa baǵyttalǵan jáne úkimettik emes uıymdardyń qoǵamdyq baqylaýdaǵy rólin edáýir arttyrýǵa múmkindik beretin Qoǵamdyq baqylaý týraly zań bar. Sondaı-aq ilespe zań jobasy petıtsııa ınstıtýtyn qalyptastyra otyryp túrli salalarda qoǵamdyq baqylaý júrgizýdi retteıdi jáne ózekti máselelerdi sheshýde azamattardyń belsendi qatysýyna múmkindik beredi. Qoǵamdyq birlestikterdi tirkeýdegi kedergilerdi azaıtý jáne olardyń qyzmeti úshin qolaıly jaǵdaı jasaý maqsatynda „Qoǵamdyq birlestikter týraly“ Zańǵa ózgerister endi», — dep jazylǵan mınıstrlik habarlamasynda.

Mınıstrlik jumysynyń ekinshi mańyzdy baǵyty — áleýmettik jobalardy iske asyrý arqyly ózekti máselelerdi sheshýge úkimettik emes sektorlardy tartý. Qazir 23 myńnan asa ÚEU tirkelgen, onyń ishinde 18 myń ÚEU jumys istep tur. Olar 2 myńnan asa áleýmettik mańyzy bar jobalardy iske asyrdy.

«Granttyq qarjylandyrý júıesi qaıta formattaldy. Tómennen joǵaryǵa qaǵıdatymen grantty josparlaý formaty ÚEU-ǵa basymdyqtardy anyqtaýǵa belsendi qatysýǵa jáne qoǵamnyń naqty qajettilikterin qamtıtyn jobalar usynýǵa múmkindik beredi. Sondyqtan qysqa, orta jáne uzaq merzimdi jobalardy qamtıtyn grant júıesi engizildi. Bul baǵytta maqsatty toptardyń jaǵdaıyn jaqsartýǵa jáne jergilikti bastamalardy damytýǵa baǵyttalǵan qoldanbaly jobalardy qoldaýǵa basymdyq beriledi», — deıdi mınıstrlik.

Túrkistan, Pavlodar, Mańǵystaý, Aqmola, Qostanaı jáne Soltústik Qazaqstan, Jetisý oblystarynyń aýyldarynda pılottyq rejımde 22 qysqa merzimdi grant jobasy iske asqan.

ÚEU-men ózara is-qımyldyń jańa tetigi — strategııalyq áriptestikti iske asyrýǵa memlekettik tapsyrys engizildi. Úkimettik emes iri uıymdarǵa halyq kóteretin túıtkildi máselelerge jedel jáne júıeli den qoıý maqsatynda memleketpen birge uzaq merzimdi áleýmettik jobalardy iske asyrýǵa múmkindik beredi.

Qoǵamdyq keńesterdiń ókilettigi keńeıtilip, quramy 90%-ǵa jańardy. Qazirgi quramnyń 86% — azamattyq qoǵam ókilderi bolsa, 10% — jastar.

Azamattyq forým alańynyń tıimdiligi úkimettik emes sektorlar men halyqaralyq uıymdaryn, bıznes jáne saraptamalyq qaýymdastyq ókilderin biriktire otyryp, ózara is-qımyl strategııasynyń basymdyqtary men salalyq máselelerin sheshý joldaryn ázirleýge negizdelgen.

Azamattyq qoǵammen birge júıeli reformalar qalyptasyp kele jatqan Ulttyq Quryltaıdyń ekinshi otyrysy joǵary deńgeıde ótti.

Halyqpen keri baılanysty tıimdi qamtamasyz etý úshin «Quryltai» mobıldi qosymshasy iske qosyldy. ÚEU-men ózara is-qımyl jónindegi úılestirý keńesi óz jumysyn jalǵastyrýda.

Keńestiń otyrystarynda úkimettik emes uıym ókilderiniń baıandamalary memlekettik organdardyń aqparatymen teń dárejede tyńdalady.

«Elimizde ınfraqurylym qurý, halyqaralyq forýmdar ótkizý jáne memleket tarapynan belsendi qoldaý kórsetýdiń arqasynda volonterlik uıymdar men belsendi volonterler sany jyldan-jylǵa artyp keledi. Qazaqstanda 680 volonterlik uıym jáne 240 myńnan asa belsendi volonter belsendi jumys isteıdi. Jalpy alǵanda bul sharalardyń barlyǵy azamattar men úkimettik emes uıymdardyń qoǵamnyń ózekti mindetterin sheshýge belsendi qatysýy úshin jaǵdaı jasaýǵa baǵyttalǵan», — deıdi Mádenıet jáne aqparat mınıstrligi.