Jyl basynan beri saýda talaptaryn buzýdyń 873 faktisi anyqtaldy – Saýda mınıstrligi

<p>ASTANA. KAZINFORM &ndash; Bıyl 3 mamyrda Premer-Mınıstr Oljas Bektenovtyń tóraǵalyǵymen maýsymaralyq kezeńde áleýmettik mańyzy bar azyq-túlik pen kókónis baǵasynyń turaqtylyǵyn qamtamasyz etý boıynsha keńes ótti.</p>

Onda memlekettik organdarǵa deldaldyq shemalardy anyqtaý boıynsha tıimdi memlekettik baqylaýdy qamtamasyz etý tapsyryldy.

Saýda jáne ıntegratsııa mınıstrligi Qarjy mınıstrliginiń Memlekettik kirister komıtetiniń elektrondyq shot-faktýralaryn (EShF) taldaý arqyly áleýmettik mańyzy bar azyq-túlikter saýdasyna monıtorıngti turaqty negizde júrgizip keledi. Osy baǵyttaǵy jumys nátıjeleri boıynsha tek saýda ústemesi mólsherine qatysty zań buzýshylar ǵana emes, sonymen qatar tıimsiz deldaldar, monopolııaǵa qarsy zańnama normalarymen retteýdi qajet etetin monopolıster, salyq organdaryna tirkelmesten áleýmettik mańyzy bar azyq-túlikpen kóterme saýda jasap júrgen adamdar anyqtalyp jatyr.

Jyl basynan beri QR Saýda jáne ıntegratsııa mınıstrligi aýmaqtyq bólimsheleri 2,5 myńnan astam tizbekti taldady. Bul oraıda Qazaqstan zańnamasyn buzý boıynsha 873 fakt anyqtalyp, 1022 ákimshilik is qozǵaldy. Bul ótken jylǵy jumys nátıjesimen salystyrǵanda 4 esege joǵary. Saýda ústemesin arttyrǵany úshin 5,2 mln teńgege 840-tan astam ákimshilik qaýly shyǵaryldy, 775 eskertý berildi.

Qabyldanǵan ákimshilik sharalardyń sany boıynsha eń kóp zań buzýshylyqtar Shymkent, Almaty, Astana qalalarynda, sondaı-aq Pavlodar jáne Aqmola oblystarynda anyqtaldy.

Іri saýda jelileri, sondaı-aq kóterme jetkizýshiler men dıstrıbıýtorlar arasynda saýda ústemesi mólsherin 15 paıyzdan asyrý men salyq zańnamasynyń buzylýy anyqtaldy.

Mysaly, Astananyń saýda jelisi kúnbaǵys maıyn satyp alyp, odan ári ony 17%–55% ústememen jeke jáne zańdy tulǵalarǵa satqan. Almatydaǵy iri sýpermarket sút ónimderine (sary maı jáne súzbe) ruqsat etilgen saýda ústemesin 43%–55%-dan asyrdy.

Saýda ústemesin iri kóterme jetkizýshiler asyrǵany anyqtaldy. Mysaly, Qazaqstanda jumyrtqa jáne taýyq etin óndiretin iri kásiporyndardyń biri bıylǵy qańtar-naýryz aılary aralyǵynda basqa kóterme jetkizýshilerden jáne otandyq óndirýshilerden áleýmettik mańyzy bar taýarlardy (qant, tuz, taýyq eti, sary maı, kúnbaǵys maıy) satyp alyp, odan ári jeke jáne zańdy tulǵalarǵa ruqsat etilgen saýda ústemeaqysynan 20%–32%-dan asyryp satqan.

Sondaı-aq, un ónimderiniń iri dıstrıbıýtory birinshi surypty un men makaron ónimderin satyp alyp, odan ári ruqsat etilgen saýda ústemesin 20%–30% -dan asyrǵan.

Barlyq anyqtalǵan faktiler boıynsha aqparat ýákiletti organdarǵa jiberildi.