Jyl basynan beri halyq densaýlyǵyna qaýipti 3 myńǵa jýyq taýar anyqtalǵan

<p>Májilistiń Ekonomıkalyq reforma jáne óńirlik damý komıtetiniń tóraǵasy Nurtaı Sabılıanov saýda saıasatyn damytý máselelerine arnalǵan Úkimet saǵatynda taýarlardy sertıfıkattaý tártibin qatańdatýdy usyndy, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

«Jyl basynan beri halyq densaýlyǵyna qaýipti 3 myńǵa jýyq taýar anyqtaldy. Sarapshylar mundaı taýarlardyń basym bóliginde jalǵan sertıfıkattar bar ekenin aıtyp otyr. Mınıstrlik saıtynyń (Saýda jáne ıntegratsııa mınıstrligi – red.) málimeti boıynsha 2023 jyldyń basynan beri 22 akkredıtteý attestaty keri qaıtaryldy, 11-i ýaqytsha toqtatyldy, ónim qaýipsizdigi týraly qujattyń 300-den astamy jaramsyz dep tanyldy», - dedi ol.

Májilis depýtaty saýda salasyndaǵy zerthanalar men sarapshy-aýdıtorlardyń qyzmetine qoıylatyn talaptardy qatańdatýdy usyndy.

«Sarapshylardyń pikirinshe, bir sertıfıkattyń ózi 100 myńnan astam taýardy satýǵa múmkindik beredi. Al olardyń ishinde sapasy kúmán keltiretinder de bolýy múmkin. Sondyqtan da akkredıtteý jónindegi organnyń, zerthanalar men sarapshy-aýdıtorlardyń qyzmetine qoıylatyn talaptardy qatańdatý qajet, sondaı-aq olarǵa baqylaýdy da kúsheıtý kerek», - dedi Nurtaı Sabılıanov.