Jyl basynan beri Aqtóbede 200-den astam ınternet alaıaqtyq deregi tirkeldi

<p>AQTÓBE. KAZINFORM &ndash; Aqtóbelikter ınvestıtsııa salamyn dep aldanyp qalyp jatyr. Uıaly telefon arqyly habarlasqan beıtanys adamdarǵa bar málimetti jasyrmaı aıtatyndardyń arasynda jasy 80-nen asqan qarııalar bar.&nbsp;</p>

Aqtóbe oblystyq Polıtsııa departamentiniń kıberpol qyzmeti aqtóbelikterge asa muqıat bolýǵa shaqyrdy. Sebebi jyl basynan beri 225 ınternet alaıaqtyq deregi tirkeldi.

- Sońǵy kezde beıtanys adam habarlasyp, sım kartasynyń qoldaný merzimi aıaqtalǵanyn aıtyp júr. Sol kezde telefonǵa habarlama jiberilip, ondaǵy kodty suraıdy. Karta merzimi sátti uzartylǵany aıtqan soń arada biraz ýaqyt ótip, «buǵan deıin sizge habarlasqan alaıaqtar» dep taǵy qorqytady. Sonymen qatar nesıe rásimdeletinin, qorǵaný úshin ózine senýin suraıdy.

Ulttyq bank qyzmetkerimin dep aıtqan beıtanys adam birneshe qosymshany júkteýge keńes beredi. Dál sol kezde olar uıaly telefon men ondaǵy bar málimetke ıelik etedi. Keıbir kezde adamdardan «jeke kýálik joǵalttyńyz ba» dep suraıdy. Munyń bári alaıaqtyń áreketi,- dedi Aqtóbe qalalyq polıtsııa basqarmasytergeý bóliminiń aǵa tergeýshisi Jalǵas Zınollın.

Adamdar áleýmettik jelini qarap otyrǵan kezde ınvestıtsııa týraly jarnama kórsetiledi. Siltemeni basqanda túrli aqparat suralady. Beıqam júrgender esh oılanbastan bos uıashyqtardy toltyryp, kóp aqparat beredi.

- Saýalnamany toltyrǵan soń beıtanys adamdar uıaly telefonǵa habarlasady. Investıtsııalyq jobaǵa qatysyp, qarjy salýǵa keńes beredi. Aqshanyń paıyzyn ósirip, keri qaıtaryp alýǵa úgitteıdi. Qosymshalardy júktep, aqsha salýdy usynady. 25-30 myńnan bastap, 300 myń teńgege deıin aqsha aýdaratyn adamdar bar. Ári qaraı eseleý úshin de aqsha suraı beredi, - dedi Jalǵas Zınollın.

Aıta keteıik, byltyr óńirde myńnan astam adam ınternet alaıaqqa aldanyp qaldy. Olardyń jalpy shyǵyny belgisiz.