Jyl basynan beri 60-qa jýyq adam kásiporynda qaza tapty
Qor qyzmetiniń negizgi baǵyty – eńbek adamynyń quqyǵyn qorǵaý, otandyq kásiporyndardaǵy eńbek qaýipsizdigin arttyrý. Resmı statıstıka osy jyldyń alǵashqy 4 aıynda qazaqstandyq kásiporyndarda 496 jumysshy jaraqattanyp, 59 adam qaza tapqanyn kórsetken. Bul ótken jylǵy osy kezeńmen salystyrǵanda 31,1% artyq.
«Bizdiń mindetimiz – azamattyń quqyǵy men múddesin qorǵaý, jumysshy men jumys berýshi arasynda konstrýktıvti dıalog ornatý, salalyq ÚEU-men, kásipodaqtarmen keleli kelissóz júrgizý. Biz óz qyzmetimizde «Qoǵamdyq baqylaý týraly» zańnyń barlyq múmkindikterin paıdalanamyz. Bul bizge ózekti problemalardy anyqtaýǵa, ony sheshýge, memlekettik basqarýǵa qatysyp, atqarýshy bılik pen jumys berýshilerdiń is-áreketiniń ashyqtyǵyn qamtamasyz etýge múmkindik beredi», -dedi qor dırektory Dana Rysmuhamedova.
Qoǵamdyq qor qazaqstandyqtar arasynda aýqymdy saýalnama júrgizip, ár aımaq turǵyndaryn alańdatqan máselelerdi anyqtaǵan. Saýalnama nátıjesi qordyń is-áreketter josparyna negiz boldy. Eńbek quqyǵyn qorǵaýdan bólek, qazaqstandyqtar ómir sapasyn arttyrýdy, kedeılikpen kúresýdi, bılik organdarynyń áreketine baqylaý ornatýdy qalaıdy.
«Eńbek jáne halyqty áleýmettik qorǵaý mınıstrligi osydan eki jyl buryn óndiriste jaraqattanýdy azaıtý maqsatynda eńbek qaýipsizdigi men ony qorǵaýdy qamtamasyz etýge jaýapty qyzmetkerlerdi daıarlaý talaptary kúsheıtilgenin málimdegen. Sol ýaqyttan beri óndiristegi jazataıym oqıǵa men jaraqattary azaıdy ma? «QazTsınk jáne Qarmettegi» problemalar, «Qazaqmys» pen «Maıqaıyń altyndaǵy» oqıǵalar otandyq kásiporyndardaǵy eńbek qaýipsizdigin kúsheıtý kerektigin kórsetip otyr, sol sebepti áleýmettik baqylaýdy kúsheıtý kerek. Biz Tótenshe jaǵdaı mınıstrligine qarasty Ónerkásiptik qaýipsizdik departamentimen birlese kásiporyndarǵa kirip, ondaǵy eńbek qaýipsizdiginiń saqtalýyn qadaǵalaýdy josparlap otyrmyz», - dedi qordyń Ulytaý oblysy boıynsha ókildik jetekshisi, kenshi Shámshi Hamze.