Jyl basynan beri 5,2 trln teńge zeınetaqy men járdemaqy tólendi

<p>ASTANA. KAZINFORM &ndash; Respýblıkalyq bıýdjet boıynsha 20,8 trln teńgege shyǵystar júrgizildi, munda áleýmettik baǵyttyń basymdyǵy saqtalyp qaldy. Bul týraly Qarjy vıtse-mınıstri Erjan Birjanov Úkimet otyrysynda baıandady.</p>

Onyń aıtýynsha, memlekettik bıýdjettiń shyǵystary 94%-ǵa, respýblıkalyq bıýdjettiń shyǵystary – 96%-ǵa jergilikti bıýdjetterdiń shyǵystary 92%-ǵa atqaryldy.

− Memleket negizgi áleýmettik mindettemelerge: zeınetaqy men járdemaqyǵa – 5,2 trln teńge, óńirlerge sýbventsııalarǵa – 4,8 trln teńge, mindetti medıtsınalyq saqtandyrý qoryna – 1,6 trln teńge jumsady, − dep túsindirdi vıtse-mınıstr.

Sonymen birge, jergilikti bıýdjetterdiń shyǵystary 13 trln teńgeni quraǵan. Shyǵystardyń negizgi úlesi áleýmettik salaǵa – 6,6 trln teńge, turǵyn úı-kommýnaldyq sharýashylyqqa – 1,9 trln teńge, kólik jáne kommýnıkatsııaǵa – 1,2 trln teńge, aýyl sharýashylyǵyna – 750 mlrd teńge baǵyttalǵan.

Aıta keteıik, bıylǵy 11 aıda memlekettik bıýdjetke 19 trln teńge tústi nemese jospar 90 paıyzǵa oryndaldy. Jospardyń tolyq oryndalmaýy salyqtar boıynsha túsimderdiń azaıýyna baılanysty bolǵan.