Jyl basynan beri 15 mln sharshy metr baspana salynǵan

<p>Jyl basynan beri Qazaqstanda jalpy óndiris kólemi 3,4%-ke ósti. Bul týraly QR Ulttyq ekonomıka mınıstri Álibek Qýantyrov aıtyp berdi, dep habarlaıdy <a href="Kazinform" target="_blank" rel="noopener">Kazinform</a>.</p>

«Jyl basynan beri óńdeý ónerkásibinde oń ósý saqtalyp otyr. Óndiris kólemi 3,4%-ke ósti. Ásirese Qyzylorda, Qostanaı, Abaı oblystary jáne Almaty qalasy eń joǵary ósimdi kórsetti. Óńdeý ónerkásibi salalary boıynsha mashına jasaý óndirisiniń 27%, onyń ishinde avtomobıl jasaýdyń – 41% jáne elektr jabdyqtaryn jasaýdyń – 32%-ten asa ósýi qamtamasyz etildi», - dedi Á. Qýantyrov Úkimettiń búgingi otyrysynda.

Sonymen birge, azyq-túlik óndirisi – 1,9%, metall buıymdary – 3,7%, qurylys materıaldary – 4,1%, plastmassa buıymdary – 5,1%, jeńil ónerkásibi – 12% jáne jıhaz óndirisi – 42% ósken.

Taý-ken ónerkásibindegi óndiris kólemi 5,2%-ke joǵarlady. Bul rette gaz óndirý – 12%-ke, munaı óndirý – 7,8%-ke, ózge de paıdaly qazbalardy óndirý – 13%-ke ósti.

Al metall kenderin óndirý – 0,5%-ke, taý-ken ónerkásibinde qyzmet kórsetý – 2,6%-ke, kómir óndirý – 5,8%-ke tómendedi.

«Atqarylǵan qurylys jumystary kólemi 12,6%-ke ulǵaıdy. 18 óńirde oń ósý tirkeldi, ásirese qurylys-montajdaý jumystarynyń eń kóp ósýi Mańǵystaý, Jetisý, Batys Qazaqstan jáne Abaı oblystarynda baıqaldy. Bıylǵy qańtar-qarashada 15 mln sharshy metrden asa turǵyn úı paıdalanýǵa berildi, bul ótken jyldyń sáıkes kezeńinen 15,6%-ke joǵary. Eń joǵary kórsetkish Astana, Almaty qalalarynda, sondaı-aq Ulytaý jáne Soltústik Qazaqstan oblystarynda tirkeldi», - dedi Álibek Qýantyrov.

Aıta keteıik, bıylǵy 11 aıda Qazaqstan ekonomıkasy 4,9% ósti.