Jyl basynan beri 12 adamnyń ajaly sýdan bolǵan

<p>ASTANA. KAZINFORM — Tótenshe jaǵdaılar mınıstrliginiń ókili Erasyl Saıpash jyl basynan beri 12 adamnyń sýǵa ketkenin, onyń ekeýi bala ekenin aıtty.</p>

«Jalpy sýǵa shomylý kezeńinde 177 adam qaza tapty. Onyń 53-i — jasóspirim. Al 2022 jylǵy statıstıkany keltirsek, 183 adam sýǵa ketken. Onyń 62-si bala bolǵan. Baıqaǵandaryńyzdaı, byltyr sýǵa batqan adamdardyń sany 2022 jylmen salystyrǵanda 4 protsentke azaıǵan. Balalardyń qaza tabýy 15 paıyz kemidi. Jyl basynan beri 12 adam sýǵa ketken. Onyń ekeýi — jasóspirim», — dedi mınıstrlik ókili ortalyq kommýnıkatsııalar qyzmetinde ótken brıfıngide.

Al Tótenshe jaǵdaılar mınıstrligi azamattyq qorǵanys jáne áskerı bólimder komıteti tóraǵasynyń orynbasary Alekseı Sovetovtiń aıtýynsha, mınıstrlik qutqarýshylar byltyr ondaǵan adamdy sýǵa ketip bara jatqan jerinen qutqaryp qalǵan. 

«Byltyr azamattyq qorǵanys organdarynyń qyzmetkerleri patrýldeý kezinde 221 adamdy sýǵa batyp bara jatqan jerinen qutqaryp qalǵan. Al bıyl qańtar men mamyr arasynda 38 adam qutqaryldy. Onyń beseýinde oqıǵa ornyndaǵy qarapaıym azamattar kómekke kelgen», — dedi komıtet ókili.