Jıhaz jasaý salasynda alaıaqtyq kóbeıip barady - sarapshy

NUR-SULTAN. QazAqparat – «Ádilet» tutynýshylardyń quqyqtaryn qorǵaý» qoǵamdyq birlestigi tóraǵasynyń orynbasary Tursyn Jaǵyparova elordada jıhaz jasaý boıynsha kásipkerlik salasynda alaıaqtyq faktileri kóbeıip bara jatqanyn aıtty, dep habarlaıdy QazAqparat tilshisi.

«Elorda boıynsha tutynýshylar tarapynan bizge kúnine eń keminde 50-60 adam shaǵymdanady. Olardyń jartysy keńes surasa, qalǵany tutynýshylyq quqyǵynyń buzylǵany týraly naqty aryzben keledi. Pandemııaǵa qatysty kóbine ınternet arqyly saýda damyp kele jatqany anyq. Degenmen, osy salada alaıaqtar kóbeıip ketkeni kórinip tur. Sondyqtan bizge osy problemaǵa qatysty shaǵym kóp túsedi», - dedi tutynýshylar quqyǵyn qorǵaý uıymynyń ókili T. Jaǵyparova.

Sonymen qatar ol qaı baǵytta alaıaqtar kóptep kezdesip jatqanyn aıtty.

«Elordada qurylys salasy damyǵan. Osy oraıda páter alyp jatqan adamdar barshylyq. Olar jıhaz jasatýǵa tapsyryp beredi. Biraq jıhaz jasaý boıynsha kásipkerlik salasynda alaıaqtyq órship barady. Tapsyrys bergen turǵyndardyń aqshasyn jınap alady da, keıinnen jıhazdy jasap bermeı nemese aqshany qaıtarmaı adamdardy álekke salady. Sonymen qatar azyq-túlik, kıimge de qatysty aryzdar bolyp jatady», - dedi Tursyn Jaǵyparova.

Aıta keteıik, búgin elordada QR Saýda jáne ıntegratsııa mınıstrliginde Dúnıejúzilik tutynýshylardyń quqyqtaryn qorǵaý kúni aıasynda tutynýshylardyń qoǵamdyq birlestikteriniń ókilderin saltanatty marapattaý rásimi ótti.