Jıhaz ónerkásibindegi ınvestıtsııa kólemi 63 paıyzǵa ósti

ASTANA. QazAqparat – Bıylǵy 9 aıdyń qorytyndysy boıynsha elimizde jıhaz ónimderin shyǵarý kólemi 4,2 paıyzǵa ósip, 46,7 mlrd teńgege jetti, dep habarlaıdy QazAqparat Indýstrııa jáne ınfraqurylymdyq damý mınıstrliginiń baspasóz qyzmetine silteme jasap.

Saladaǵy ósim kórsetkishi ınvestıtsııa kóleminiń artýymen baılanysty. Atap aıtqanda, qańtar-qyrkúıek aılary aralyǵynda jıhaz ónerkásibine 3 mıllıard teńgeden astam ınvestıtsııa salynǵan. Bul – ótken jyldyń sáıkes kezeńimen salystyrǵanda 63 paıyzǵa artyq.

Investıtsııa jańa jobalar men jumys istep turǵan kásiporyndardy damytýǵa baǵyttalǵan. Máselen, bıyl Shymkent qalasynda jıhaz jasalatyn jańa kásiporyn iske qosylsa, Soltústik Qazaqstan oblysynda osy ónerkásip úshin shıkizat komponentterin shyǵarý kásiporny paıdalanýǵa berildi.

Óńirler arasynda jıhaz ónimderin shyǵarý boıynsha jetekshi oryndy Almaty qalasy alady. Megapolıste óndiris kólemi – 13,3 mlrd teńge. Shahar aýmaǵynda osy saladaǵy barlyq jumys istep turǵan kásiporyndardyń 30 paıyzy shoǵyrlanǵan. Sondaı-aq, jıhaz óndirisi boıynsha kóshbasshylar qataryna Almaty (3,5 mlrd teńge), Qaraǵandy (3,4 mlrd teńge) jáne Pavlodar (3,4 mlrd teńge) oblystary kiredi.

Elimizde jıhaz ónimderin tutyný naryǵy ótken jyly 221 mıllıard teńge kóleminde boldy. Sarapshylar halyq sanynyń ósýi, kóshi-qon, kiristiń ulǵaıýy, ınfraqurylymnyń keńeıýi, sondaı-aq jańa turǵyn úı jobalary men kommertsııalyq úı-jaılar qurylysynyń ósýi esebinen jıhaz ónimderin álemdik tutynýdyń turaqty ósýin boljaıdy.

Aıta ketsek, 2023 jyldyń shildesinde barlyq memlekettik organdar men kvazımemlekettik sektor sýbektileri úshin ofıstik jıhaz satyp alýǵa moratorıı merzimi aıaqtalady.

Foto: berlaere.nl