Jıhadqa attanǵandar kózdegenine jetý úshin bárine daıyn bolady – teolog

ALMATY. QazAqparat – Jat aǵym ilimimen sanasy ýlanǵan azamattar qandaı jolmen bolsyn maqsatyna jetýge daıyn bolady. Osyndaı oqıǵalardyń birin Aqtóbede ýaqytsha qamaý ızolıatorynda jumys istep kelgen belgili dintanýshy, teolog, Nur-Múbarak Egıpet ıslam mádenıeti ýnıversıtetiniń doktoranty Serikjan Enshibaı aıtyp berdi, dep habarlaıdy QazAqparat tilshisi.

«Radıkal sáláfı baǵytyndaǵy azamattar óz maqsattaryna jetý úshin kóptegen aıla tásilge barady. Quqyq qorǵaý organdarynyń quryǵy uzarǵan saıyn maqsatyna jetýge asyqqan olar Sırııaǵa ketý úshin boıanyp, kıimderin sheship tastap, din ustanbaıtyn adam qusap júredi. Sondaǵy túpki maqsat – eshkimniń kúdigine ilinbeı Sırııaǵa ketip qalý. Sondaı oqıǵa Aqtóbede boldy. Mıkroavtobýspen ketip bara jatqan 10 otbasy der kezinde quqyq qorǵaý organynyń quryǵyna tústi. Olardyń barlyǵy hıdjabtaryn sheshken. Eshqandaı dinı atrıbýt joq. Kishkentaı sábılerin alyp alǵan. Ustalǵan kezde bireýi - Qyrǵyzstanǵa, ekinshisi – Reseıge bara jatyrmyz degen ýáj aıtty. Sonymen qatar, buryn únemi nıkab kıip júretin Aqtaýlyq eki qyz da bir mezette kıimderin sheship tastap shetelge ketip bara jatqanda áýejaıda ustaldy», - dedi Serikjan Enshibaı.

Teologtyń aıtýynsha, qazir kóptegen teris aǵymdaǵy adamdar dinı atrıbýtıkany tastaı bastaǵan.

«Biz únemi sáláfı baǵytyndaǵy adamdar saqal qoıady, balaǵy qysqa bolady deımiz ǵoı. Qazir olar kostıým shalbar kııýi múmkin. Saqaly bolmaýy da ǵajap emes. Іssaparmen bir ákimshilikke barǵanda qyzmetkerler bizde osyndaı jigit bar, únemi din týraly áńgime aıtady dep sonymen sóılesip berýdi ótingen bolatyn. Jolyǵyp sóıleskende álgi jigittiń adasyp júrgenin túsindim. Keıin jumysynan shyǵyp ketti», - dedi ol.

Sarapshy aıtqandaı, sálafı aǵymynyń birneshe tarmaǵy bar. Olardyń barlyǵy birdeı jıhadqa shaqyrmaıdy.

«Bireýler ishinde bir barmaǵyn búgip, jasyryn júredi. Kóptegen teolog, psıhologtar ashyq nasıhattaıtyndardan góri jasyryn, tynysh júretinderden qaýip kóbirek dep sanaıdy. Jat jerge baryp jıhadqa qatyspaq bolǵandardyń nıeti kóp nárseden baıqalady. Kishkene balalarǵa pasport tapsyrys beredi. Úılerin, múlkin satýlary múmkin. Ne bolmasa múlkin basqa bir adamǵa senimhatpen qaldyrady. Notarıýsqa barǵan kezde kúdikke ilinýi múmkin», - dedi teolog.