Jıgýlı Daırabaevtyń eki uly sýbsıdııa retinde alǵan 550 mln teńgeni óz qajetine jumsaǵan

ASTANA. QazAqparat – Keshe Taraz qalasynyń №2 soty alaıaqtyq jasady jáne iri mólsherde aqsha jymqyrdy dep aıyptap, úkim shyǵarǵan eki kúdiktiniń Májilis depýtaty Jıgýlı Daırabaevtyń uldary ekeni belgili boldy, dep habarlaıdy QazAqparat.

Eske ala keteıik, Jambyl oblystyq aýyl sharýashylyǵy basqarmasy basshysynyń ósimdik sharýashylyǵy máseleleri jónindegi orynbasary Erlan Qulkeev, kásipkerler Eljan Elibaı, Dıdar Moldaqalyq jáne Marat Daırabaev sýbsıdııa qaǵıdalaryn buza otyryp, «Albıon» qulpynaı kóshetterine memleketten sýbsıdııa alǵan.

Onyń bir bóligi alaıaqtyq jolmen urlanyp, jeke qajettiligine jumsalǵan. Memleketke 550 849 430 teńge kóleminde zalal keldi.

Osynyń ishinde Dıdar Moldaqalyq pen Marat Daırabaev - Májilis depýtaty Jıgýlı Daırabaevtyń uldary.

Sotta aıyptylardyń kinási tolyq dáleldendi.

Óz kezeginde sottalýshylar kinásin moıyndamaı, aqtaýdy ótindi.

Basqarma basshysynyń orynbasary Erlan Qulkeev 6 jylǵa sottaldy, ol ómir boıy memlekettik qyzmette eńbek ete almaıdy.

Al Dıdar Moldaqalyq pen Marat Daırabaev 5 jylǵa shartty túrde sottaldy.

Úkim zańdy kúshine engen joq.