Jıgýlı Daırabaev turǵyn úıge ıelik etýge qatysty sot protsesinde jeńildi
Turar Rysqulov aýdandyq sotynyń baspasóz qyzmeti bergen málimetke súıensek, Saıd Rýzıev sotqa aryzben júginip, 2021 jyldyń 5 qarashasynda jasalǵan turǵyn úıdi satý-satyp alý týraly mámileni jaramsyz dep taný, jubaıy – R.F. arasyndaǵy jyljymaıtyn múlikti birlesken ortaq múlik dep taný, Merki aýdany Sarymoldaev aýylynda ornalasqan jyljymaıtyn múlikte óz úlesin ½ bóligi mólsherinde anyqtaý týraly suraǵan.
Іs materıaldarymen anyqtalǵandaı, Saıd Rýzaev jubaıymen 2002 jyly otaý quryp, 2017 jyly nekeni buzý týraly sot sheshimi shyqqan.
2021 jyly S.Rýzaevtiń kelisiminsiz jubaıy R.F. ortaq múlik – turǵyn úıdi jaýapker Jıgýlı Daırabaevqa satý týraly mámile rásimdegen.
2022 jyly Jambyl oblystyq soty 2017 jyly shyqqan nekeni buzý týraly sheshimniń kúshin joıdy. Sebebi Saıd Rýzaev sol kezde sot protsesine qatyspaǵan. Solaısha, erli-zaıypty arasyndaǵy neke resmı túrde 2022 jyly ǵana buzylǵan.
S.Rýzaev talap etip otyrǵan daýly baspana ortaq múlik bolyp tabylady. Ol is materıaldarymen rastalǵan.
«Sot otyrysynda anyqtalǵandaı, 2007 jyly atalǵan turǵyn úı jyljymaıtyn múlikti jarııa etý jónindegi komıssııanyń sheshimi negizinde jaýapker – Jıgýlı Daırabaevqa tirkelgen.
«Neke (erli-zaıyptylyq) jáne otbasy týraly» týraly kodekstiń talaptaryna sáıkes, erli-zaıypty nekede turǵan kezeńinde alǵan múlki olardyń birlesken ortaq menshigi bolyp tabylady. Erli-zaıyptynyń biri jyljymaıtyn múlikke ıelik etý boıynsha mámile jasaý úshin, jubaıynyń notarıaldy kýálandyrylǵan kelisimin alýy qajet.
Sot jaýapker daýly múlikti satqan kezde talap qoıýshynyń notarıaldy kýálandyrylǵan kelisimin almaǵanyn anyqtady. Bul talap qoıýdy qanaǵattandyrý týraly sheshim shyǵarýǵa negiz boldy.
Sot sheshimi zańdy kúshine engen joq», - delingen sot habarlamasynda.
Eske salaıyq, buǵan deıin Taraz qalasynyń №2 soty alaıaqtyq jasady jáne iri mólsherde aqsha jymqyrdy degen aıyppen eki kúdiktige – Májilis depýtaty Jıgýlı Daırabaevtyń uldaryna qatysy úkim shyǵarǵan bolatyn.