Jıgýlı Daırabaev elimizge Agrobank ne úshin kerektigin aıtty
«Aýyl» partııasynyń fraktsııa depýtattarynyń saýaly 280 myńǵa jýyq fermerdiń, myńdaǵan sala mamandary men aýyl kásipkerleriniń talabyna aınalǵan Agrobank qurý máselesine arnalyp otyr. Bul taqyryptyń bıik minberlerden kóterilip júrgenine on jyldan asty. Ulttyq bank pen Qarjy naryǵyn retteý agenttiginiń jaýyr bolǵan jaýaptaryn qoldanbaı, Úkimet basshysy retinde agrobank qurýǵa qatysty naqty pozıtsııańyzdy aıqyndaýdy suraımyz. 2022 jylǵy 19 mamyrda Memleket basshysy kásipkerlermen kezdesý barysynda Úkimetke osy máseleni zerdeleý kerek dep aıtqan bolatyn», - dedi J. Daırabaev Úkimet basshysy Álıhan Smaıylovtyń atyna joldaǵan saýalynda.
Osy oraıda ol elimizde Agrobank qajet ekenin aıtty.
«Birinshiden, «Agrarlyq nesıe», «QazAgroQarjy» sııaqty kvazımemlekettik qarjy ınstıtýttary bar bolsa da, olar arqyly beriletin nesıeniń kólemi óte az. Fermerlerge búginde kem degende 2 trln teńge qajet. Elimizdi agrarlyq derjavaǵa aınaldyramyz desek, bul turǵyda 5 trln teńge kerek. Al qarjy ınsıtýttary arqyly beriletin qarajat onyń onnan bir bóligine de jetpeıdi. Tolyqqandy bank retinde jumys isteı almaǵan soń qarjy ınstıtýttary qosymsha kiris kózin asha almaıdy. Demek olar aınalymdaǵy kapıtalyn eshqashan da ulǵaıta almaıdy degen sóz. Árıne, syrttan qaryz alýǵa bolady, biraq «QazAgro» holdınginiń 2012 jylǵy qateliginen valıýta qunynyń aıyrmashylyǵy bıýdjet pen fermerlerdiń moınyna túskenin umytpaıyq», - dedi depýtat.
Onyń aıtýynsha, jeke bankterdiń agro salany qarjylandyrýǵa yntasy óte tómen.
«Depozıt jınap, kassalyq operatsııa arqyly paıda taýyp, qaraptan-qarap baıyp otyrǵan osy bankterdi kim retteıdi? Olardy agrarlyq salaǵa nesıe bólýge zańnama arqyly mindetteıtin zań normalary da joq. Bul qalaı? Búginde «Agrarlyq nesıe korporatsııasy», «QazAgroQarjy», tipti «Báıterek» sııaqty kvazımemlekettik mekemelerdiń qoly baılaýly. Sondyqtan Qazaqstannyń agrarlyq salasyna óziniń mamandyrylǵan banki kerek. «Aýyl» partııasynyń talaby osy. Agrarly banktiń qurylýyna qarsy adamdar aýyl sharýashylyǵy salasynyń tıimdiligi tómen, táýekelderi kóp ekenin alǵa tartady. Qazaqstan agrarly derjavaǵa aınalýy úshin, eń aldymen, óziniń derbes agrobankin qurýy tıis. «Agrarlyq nesıe korporatsııasy», «QazAgroQarjy» jáne taǵy basqa qarjy ınstıtýttarynyń basyn biriktirip, memleketten jyl saıyn bólinip jatqan qarjyny bir jerge toptastyryp, memlekettiń qatysýymen agrobank ashýdy usynamyz», - dedi Jıgýlı Daırabaev.