«Jibek joly» keden beketinde esirtki tasymalyna qatysty 4 fakti anyqtaldy

NUR-SULTAN. QazAqparat – Bıylǵy jyl basynan Túrkistan oblysyndaǵy «Jibek joly» keden beketinde esirtki zattaryn alyp ótý áreketiniń 4 oqıǵasy tirkelgen. Esirtkini zańsyz tasymaldaýshylar ártúrli tásilderdi paıdalanbaq bolǵan, dep habarlaıdy QazAqparat tilshisi,

QR Qarjy mınıstrligi Memlekettik kirister komıtetiniń málimetinshe, osy jyldyń 25 qańtarynda tirkelgen oqıǵa boıynsha, «Jibek joly» keden beketinde Túrkistan oblystyq Memlekettik kirister departamentiniń qyzmetkerleri QR Ulttyq qaýipsizdik komıtetiniń ókilderimen birlese tekserý barysynda Ózbekstannyń 44 jastaǵy azamatyn ustady. Qyzmettik ıtterdiń kómegimen odan aıyryqsha ıisi bar esirtki zaty tabyldy.

Al 8 aqpan kúni Ózbekstan Respýblıkasyna ótý baǵytyndaǵy jolaýshylar termınalynda qyzmettik ıttiń kómegimen kórshi eldiń 61 jastaǵy azamaty ustaldy. Onyń syrt kıiminiń qaltasynan polıetılen paketine oralǵan jasyl tústi zat tabylǵan.

Sonymen qatar 11 aqpan kúni «Jibek joly» keden beketinde taǵy osyndaı jaǵdaı oryn alǵan. Departament pen QR UQK qyzmetkerleri Mańǵystaý oblysynyń 40 jastaǵy turǵynynan skotchpen oralǵan kúdikti zat anyqtaldy.

Osy kúni esirtki tasymaldaýǵa qatysty taǵy bir oqıǵa tirkeldi. Tájikstan Respýblıkasynyń azamaty kıimine jasyrynǵan esirtki zatyn shekaradan alyp ótpekshi bolǵan jerinen ustaldy.

Osy 4 fakti boıynsha júrgizilgen sot saraptama jumystarynyń nátıjesinde bul zattardyń bári keptirilgen marıhýana, gashısh sekildi esirtki zattar ekeni anyqtaldy. Qazirgi tańda barlyq oqıǵa boıynsha qylmystyq is qozǵaldy.