Jibek joly elderiniń mýzykalyq mekemeleri basshylary Astanada bas qosty
EKSPO-2017 halyqaralyq mamandandyrylǵan kórmesi aıasynda uıymdastyrylǵan bul forýmǵa Reseı, Qytaı, Ońtústik Koreıa, Túrkııa, Italııa, Ázerbaıjan syndy 13 eldiń joǵary oqý oryndary men mádenı mekemeleriniń basshylary keldi. Olar Qazaq ulttyq óner ýnıversıteti (QazUÓÝ) orkestriniń ónerin tamashalap, ataqty mýzykatanýshy Bolat Sarybaev jınaǵan qazaqtyń ulttyq mýzykalyq aspaptar kórmesin aralady.
Forýmnyń ashylý saltanatynda sóz sóılegen QazUÓÝ rektory Aıman Musaqojaeva qonaqtardy EKSPO kórmesiniń ashylýymen quttyqtady jáne atalǵan kórmeniń qazaqtyń ulttyq ónerin jahandyq deńgeıde nasıhattaýǵa múmkindik beretinin erekshe atap ótti.
«Qazaqstan úshin bul óte mańyzdy ári jaýapty shara. EKSPO-2017 kórmesiniń ıdeıasy bolashaqtyń energııasymen, al bizdiń jaǵdaıda san ǵasyrlyq álemdik jáne ulttyq óner energııasymen baılanysty. Atalǵan kórme Qazaqstannyń mádenıet jáne óner ókilderine qazaqtyń ulttyq óneriniń barlyq salalaryndaǵy jaýhar týyndylardy, elimizdiń gúldenýi men uzaq jasaýynyń kepili bolyp tabylatyn ejelgi ulttyq kodymyzdy jahandyq deńgeıde kórsetýge múmkindik beredi», - dedi Aıman Qojabekqyzy.
Sondaı-aq, ýnıversıtet rektory sheteldik mýzykalyq mekemeler basshylarynyń mundaı aýqymdy quramy Qazaq ulttyq óner ýnıversıtetinde alǵash bas qosyp otyrǵanyn málimdedi.
«Jibek joly elderindegi mýzykalyq mekemeler basshylary forýmynyń geografııalyq sheńberi keńeıip otyrǵany qýantady. Bizdiń bıylǵy forýmǵa Dankook ýnıversıteti (Ońtústik Koreıa), Mımar Sınan atyndaǵy Ystanbul óner ýnıversıteti (Túrkııa), Qyrǵyz ulttyq konservatorııasy, Ózbekstan Memlekettik konservatorııasy, Qazan memlekettik konservatorııasy, Santa-Chechchılııa konservatorııasy qosyldy. Qazaqstannyń óner salasyndaǵy zııaly qaýym atynan forýmymyzdyń jyldan-jylǵa nyǵaıa túserine úmit bildiremin», - dedi ol.
Sonymen birge, Aıman Musaqojaeva sheteldik áriptesterin ózi rektorlyq etetin Qazaq ulttyq óner ýnıversıtetiniń qyzmetimen tanystyryp, oqý oryndary arasynda ózara stýdent almasýdy kóbeıtý men jańa ǵylymı-bilim berý baǵdarlamalaryn qurýdy usyndy.
«Qazaq ulttyq óner ýnıversıtetiniń ujymy mýzykalyq óner salasyndaǵy árbir talanttyń shyǵarmashylyq shyńdalýy úshin halyqaralyq talaptarǵa saı sapaly bilim berý ortasyn qurýdy maqsat etip otyr. Mýzykalyq daryndy jastar ǵana bolashaqta ulttyq shyǵarmashylyq elıtanyń ózegine aınalady. (...) Búgingi forým oqý oryndary jáne kóptegen salalardaǵy mádenı nysandar arasyndaǵy baılanystardy nyǵaıtýǵa, atap aıtqanda, oqytýshylar men stýdentterdiń akademııalyq mobıldigi men jańa ǵylymı-bilim berý baǵdarlamalaryn qurýǵa septigin tıgizerine úmittenemin», - dedi Aıman Musaqojaeva.
Eki kúnge sozylatyn forýmda mýzykalyq mekeme basshylary dástúrli ulttyq mádenıetti saqtaý men damytý máseleleri, mýzykalyq muranyń sabaqtastyǵy - óner salasyndaǵy joǵary oqý oryndarynyń tájirıbesi jáne «Óner energııasy - bolashaq energııasy» taqyryptaryn talqylap, mádenıet pen óner salasyndaǵy óz tájirıbelerimen bólisedi.