JI: Mıllıondaǵan brıtanııalyq jumyssyz qalady

<p>Jasandy ıntellekt bolashaqta Ulybrıtanııadaǵy mıllıondaǵan adamdy jumyssyz qaldyrady. Sarapshylar arnaıy zertteý júrgizip, osyndaı mámilege keldi. Jańa tehnologııalar, ásirese, áıelderdi jáne jas mamandardy nápaqasynan aıyrýy múmkin. Joǵary aılyq alatyndarǵa tónip turǵan qaýip tipti orasan. Jergilikti úkimet te, kompanııalar da eńbek ónimdiligin arttyrý úshin neırondyq jelilerge senip otyr, dep habarlaıdy Kazinform-nyń osy eldegi menshikti tilshisi Ǵalymjan Qaramanuly.</p>

Ulybrıtanııa ózin jasandy ıntellekt salasyndaǵy zertteýler men ınnovatsııalardyń álemdik kóshbasshysy etip tanytýǵa tyrysýda. Bul el jaqynda 25-ten astam memleket ókili qatysqan Jasandy ıntellekt qaýipsizdiginiń halyqaralyq sammıtin ótkizdi. Kúni keshe Ulybrıtanııa men AQSh jetildirilgen neırondyq jelilerdi testileý boıynsha mańyzdy kelisimge qol qoıyp, birlese jumys isteıtinin málimdedi.

«Ulybrıtanııa 9 jańa jasandy ıntellekt ǵylymı-zertteý ortalyǵyn iske qosýǵa jáne tehnologııany retteýshilerdi oqytýǵa 100 mıllıon sterlıng fýnty kóleminde qarajat jumsamaq. Neırondyq jeliler tez damyp keledi, biraq biz ózimizdiń sol jyldamdyqqa ilese alatymyzdy kórsetkimiz keledi», — deıdi Ulybrıtanııanyń Ǵylym, ınnovatsııa jáne tehnologııa mınıstri Mıshel Donelan.

Eger Brıtan úkimeti bul saıasatyn jalǵastyra beretin bolsa, keleshekte 8 mıllıonǵa jýyq adam eki qolǵa bir kúrek tappaı qınalýy yqtımal. Memlekettik saıasatty zertteý ınstıtýty osyndaı málimdeme jasady. Búginde neırondyq jeliler adam jasaýy tıis qyzmettiń 11 paıyzyn atqaryp keledi. Mysaly, jumysqa ornalasý úshin talapkerler kadrlar qyzmetiniń mamanymen emes kompıýtermen suqbattasady.

«Jumysqa turar aldynda vıdeo ıntervıýge qatystym. Meni tiri adam emes jasandy ıntellekt jiti tekserdi. Túıindememe jáne mımıkama qarap, jumysqa jaramsyz dep tapty. Bul meni qatty kúızeltti», — deıdi vızajıst Anteıa Maırýdhıý.

Jaǵdaı jaǵa ustatarlyq. Kompanııalar zamanaýı tehnologııany tereńirek engizgen saıyn jumystyń shamamen 60 paıyzyn jasandy ıntellekt atqarmaq. Eger úkimet, jumys berýshiler jáne kásipodaq uıymdary mańyzdy sheshim qabyldap, jańa tehnologııalardy basqara alatyndyqtaryna kepildik bermese, jappaı jumyssyzdyq beleń alýy yqtımal! Olar qazir áreketýi tıis, keıin tym kesh bolýy múmkin deıdi zertteýshiler.

«Áıelder men jastardyń jańa tehnologııalarmen yǵystyrylý qaýpi joǵary. Názikjandylardyń tehnologııalyq salalardaǵy úlesi az. Sondaı-aq oqý oryndaryn jańa bitirgen jastarǵa arnalǵan bos jumys oryndary azaıyp barady. Úkimet jumyssyzdyqtyń aldyn alý úshin jańa zań engizýdiń ornyna kásiporyndarǵa salyqtyq jeńildikter usynyp, avtomattandyrýǵa kele bermeıtin jumys oryndaryn kóbeıtýi kerek», — deıdi LinkedIn áleýmettik jelisiniń bas ekonomısi Karın Kımbroý.

Mamandardyń pikirinshe, orta mektepter men jumys berýshiler halyqty jańa ómirge ıkemdep, jasandy ıntellektti basqarýǵa qajet daǵdylardy úıretýleri tıis. Sala mınıstrligi bul zertteýdi tájirıbege emes teorııaǵa negizdelip jasalǵan jáne shyndyqpen janaspaıdy dedi. Jasandy ıntellekt jyl saıyn Ulybrıtanııa ekonomıkasyna 3,7 mıllıard sterlıng fýntynan astam aqsha ákeledi eken.

Sala mamandary neırondyq jelilerdiń adam mıynyń kóshirmesi ekenin moıyndaıdy. Biraq olar tolyq damymaǵan jáne qatelikter jasaýǵa óte beıim kórinedi.

«Bizdiń qolymyzda bar tehnologııa ázirge shıki. Qatelikterge kóp jol beredi. Eger siz baǵdarlamashy bolsańyz, jasandy ıntellekt sizge kómekshi qural bola alady. Júrgizýshi bolsańyz kóligińizdi basqarýǵa járdemdesedi. Bul barlyq mamandyq úshin ortaq stsenarıı. ıAǵnı, ónimdilikti arttyrýdyń qosymsha kómekshisi bolady», — deıdi Alphabet kompanııasynyń bas dırektory Sýndar Pıchaı.

LinkedIn zertteýine sáıkes jasandy ıntellektti basqarý daǵdylaryn halyqqa úıretý boıynsha Ulybrıtanııa AQSh, Germanııa, Kanada jáne Izraılden artta keledi. Áleýmettik jeliniń zertteýinshe, Brıtan kásiporyndarynyń jartysynan azy ǵana qyzmetkerleriniń biliktiligin arttyrýǵa ınvestıtsııa quıyp jatyr. Kóshten qalyp qoıǵan Tumandy Albıonnyń bolashaǵy bulyńǵyr bolýy ábden múmkin.