«Jezkıik» festıvaline kelgen meksıkalyqtarǵa dombyra úni unap qaldy

QARAǴANDY. QazAqparat - Ulytaý baýraıynda halyqaralyq «Jezkıik» festıvali bastaldy. «Rýhanı jańǵyrý» baǵdarlamasy aıasynda uıymdastyrylǵan án keshine álemniń eń úzdik mýzykanttary qatysyp jatyr, dep habarlaıdy QazAqparat 24.kz silteme jasap.

Ár qıyrdan jınalǵan 11 óner ujymy ózderiniń ulttyq aspabymen, ulttyq ánderin shyrqady. Máselen, japondar koto, haıası, sıakýhatı dep atalatyn ulttyq mýzykalyq aspabymen án shyrqady. Dybysy óte názik bolǵanymen, qulaqqa jaǵymdy. Sondaı-aq shotlandyqtardyń volynkasy da kózge tústi. Úni qazaqtyń sazsyrnaıyna keledi.

Festıval aıasynda qonaqtar ár ulttyń ónerimen, tarıhymen tereńirek tanysýǵa múmkindik aldy. «Jezkıik» festıvaliniń qatysýshysy Denıal Chaves Gonsaleske qazaqtyń qara dombyrasynyń úni unap qalypty.

«Bizge dombyra qatty unady. Dybysy keremet. Ásirese dalada oınaǵanda, tabıǵatpen úndesip, keremet áser qaldyrady eken. Bizdiń vıýella aspabyna óte uqsas» deıdi ol.

Halyqaralyq mýzyka festıvaline álemniń ár qıyrynan 92 ónerpaz qatysty. Olar ózderiniń ulttyq aspaptarynda oınap, etno ánderdi shyrqady. Áserli keshti tamashalaýǵa kelgen jurttyń qarasy kóp.

«Ejelgi Ulytaýda úsh júzdiń basy qosylsa, búgingi Ulytaýda úsh qurlyqtyń ókilderiniń bastary qosylyp otyr. Shynynda da, bul bizdiń táýelsizdigimizdiń, sol táýelsizdikke jetkizgen Elbasynyń saıasaty men eńbeginiń arqasynda dep oılaımyn» deıdi Qaraǵandy oblysynyń ákimi Erlan Qoshanov.

Keshte mádenıet jáne sport mınıstri Arystanbek Muhamedıuly festıval qatysýshylaryna Elbasynyń quttyqtaý hatyn jetkizdi. Joǵary deńgeıde uıymdastyrylǵan án keshin endi jyl saıyn dástúrli túrde ótkizip turýdy usyndy.

Aıta ketý kerek, úsh kúndik festıval Jezqazǵan qalasynda jalǵasady. Munda klassıkalyq mýzyka keshi ótpek.