Jezqazǵannyń eki turǵyny qarjy pıramıdasyn jarnamalaǵany úshin tergeýge alyndy

JEZQAZǴAN. QazAqparat - Jezqazǵan qalasynyń eki turǵynyna qatysty «MetaGo» qarjy (ınvestıtsııalyq) pıramıdasy jarnamalaý kúdigi boıynsha sotqa deıingi tergep-tekserý bastaldy, dep habarlaıdy QazAqparat.

Atalǵan faktini Qarjylyq monıtorıng agenttigi Ulytaý oblysy boıynsha departamenti óńirlik prokýratýranyń úılestirýimen jáne agenttiktiń kóleńkeli ekonomıka salasyndaǵy taldamalyq bólimshelerimen ózara is-qımyl nátıjesinde anyqtady.

Kúdikti tulǵalar «MetaGo» qarjy pıramıdasynyń qyzmeti týraly aqparattyq resýrstarda («YouTube» beınehostıng saıty, «Whatsapp» jáne «Telegram» messendjerleri, «Facebook» jáne «Instagram» áleýmettik jelileri), sondaı-aq osy qarjy pıramıdasynyń sımvolıkasy bar kıim men plakattardy paıdalana otyryp halyqpen kezdesýler men jınalystar ótkizgen. Osy arqyly 63 mln teńgeden astam somada zalal keltirip, qarjy pıramıdasynyń zańsyz qyzmetine 80-nen astam azamatty tikeleı tartqan.

Qazirgi ýaqytta QR QK-niń 217-1-baby - adamdar tobynyń qarjy pıramıdasyn jarnamalaýy boıynsha tergeý júrgizilýde.

Sonymen qatar, departament buryn júrgizilgen arnaıy jedel-izdestirý is-sharalary nátıjesinde tirkelgen Jezqazǵan qalasynyń osy turǵyndaryna qatysty «MetaGo» qarjy pıramıdasynyń qurylymdyq bólimshesin qurý jáne basshylyqqa alý faktisi boıynsha sotqa deıingi tergeý júrgizýde.

QR QPK-niń 201 baby tártibinde ózge aqparat jarııa etýge jatpaıdy.

Eger siz jáne sizdiń týystaryńyz «MetaGo» kompanııasynyń qyzmetinen zardap shekse, turǵylyqty jerińiz boıynsha Ekonomıkalyq tergeý departamentine nemese QMA call-ortalyǵyna habarlasyńyz.