Jezqazǵandyq azamat alkogol men temeki ónimderin zańsyz satqan

JEZQAZǴAN. QazAqparat - Ulytaý oblysy boıynsha Memlekettik kirister departamenti men Ekonomıkalyq tergep-tekserý departamenti birlesip Jezqazǵan qalasynda alkogol jáne temeki ónimderiniń zańsyz aınalymyn anyqtady, dep habarlaıdy QazAqparat.

Uzaq ýaqyt boıy jezqazǵandyq azamat PET-bótelkelerde shyǵý tegi belgisiz alkogol jáne temeki ónimderin sáıkestendirý quraldarynsyz saqtaý jáne bólshek saýdada ótkizý jónindegi zańsyz qyzmetti júzege asyrdy.

Birlesken is-sharalar nátıjesinde halyqqa satýǵa daıyndalǵan 8 855 lıtr kólemindegi alkogol ónimi, sondaı-aq 5 821 qorap temeki tabyldy ári tárkilendi. Alkogol jáne temeki ónimderine eń tómengi bólshek saýda baǵalaryn qoldanǵanda, ónimniń jalpy quny 20 mln teńgeden asady.

Qazirgi ýaqytta osy fakt boıynsha Qylmystyq kodekstiń (Zańsyz kásipkerlik) 214-baby 1-bóligi boıynsha sotqa deıingi tergep-tekserý júrgizilip jatyr.