Jezqazǵandaǵy jylý ortalyǵynyń qazandyǵynan aqaý shyqty

JEZQAZǴAN. QazAqparat – Jezqazǵan qalasynyń jylý elektr ortalyǵynyń №5 qazandyq agregatynan aqaý shyqty. Bul týraly Ulytaý oblysy ákimdiginiń baspasóz qyzmeti málim etti, dep habarlaıdy QazAqparat tilshisi.

Ákimdik aqparatyna sáıkes, 27 qarashada saǵat 22:19-da Jezqazǵan qalasynyń jylý elektr ortalyǵyndaǵy №5 qazandyq agregatynda aqaý shyǵyp, onyń jumysy toqtatylǵan.

«Qazirgi ýaqytta qazandyq salqyndatylyp jatyr. Mamandar qazandyqtyń tóbesin jýýǵa jáne aqaýdy anyqtaýǵa kiristi. Jylý elektr ortalyǵynyń №5 qazandyq agregatynyń toqtaýyna baılanysty jylý kózinde qyzbaý 20 gradýsty qurady. Atmosferalyq aýa temperatýrasy -12 gradýs bolǵanda, jylý berý qubyrynda 71 gradýs jáne sý keri qaıtatyn qubyrda 53 gradýs boldy. Al bekitilgen temperatýralyq standartqa sáıkes, ol 91 jáne 54 gradýs bolýy qajet», - dep málimdedi Jezqazǵan qalasynyń ákimi Qaırat Shaıjanov.

Ol aqaýdy joıý boıynsha tıisti jumys júrgizilip jatqanyn jáne búgin túnde taıaýda kúrdeli jóndeýden ótken №6 qazandyq agregaty iske qosylatynyn atap ótti. Qaırat Shaıjanovtyń aıtýynsha, erteńnen bastap qalada 4 qazandyq jumys isteıdi. Sonymen qatar №4 qazandyq rezervke qoıylady.

Ákimdik málimetinshe, 2022-2023 jyldardaǵy jylý maýsymyna daıyndyq aıasynda 6 qazandyq agregaty, 5 týrbına, JEO-nyń qosalqy jabdyqtary men qurylystaryn jóndeýge 3,8 mlrd teńge bólingen.

Qosa ketsek, keshe Ekibastuz JEO-synda apat bolyp, qala turǵyndary jylýsyz qalǵan edi. Sońǵy derekter boıynsha jylý qubyryndaǵy sýdyń atqylaýyn toqtatý birneshe magıstralda jalǵasýda.