Jezqazǵandaǵy apattyq jaǵdaıdaǵy úılerdiń turǵyndary qashan kóshiriledi – Berik Ádiǵalıuly jaýap berdi

<p>Ortalyq kommýnıkatsııalar qyzmetinde ótken brıfıngte Ulytaý oblysynyń ákimi Berik Ábdiǵalıulyna Jezqazǵandaǵy apattyq jaǵdaıdaǵy eski úılerdiń máselesin qalaı sheship jatqanyn aıtty, dep habarlaıdy <a href="https://kaz.inform.kz/" target="_blank" rel="noopener">Kazinform </a>agenttigi.</p>

«Jezqazǵanda 1950 jyldan beri kele jatqan kópqabatty aǵash úıler bar. Osy apattyq jaǵdaıdaǵy úılerdiń turǵyndaryn qaýipsiz baspanaǵa kóshirý máselesi birneshe jyldan beri kóterilip kele jatyr? Bul másele qashan sheshiledi», - dep surady jýrnalıst.

Oblys basshysynyń aıtýynsha, Ulytaý jeke oblys bolǵannan beri baspana baǵasy qymbattap shyǵa kelgen. Bul apattyq jaǵdaıdaǵy úılerdiń máselesin sheshýge kedergi keltirip turǵan kórinedi.

«Ókinishke qaraı, bul bizdegi óte úlken problemalardyń biri bolyp ketti. Oblys ajyramaı turǵanda bul jumystar bastalǵan. Renovatsııa aıasynda olarǵa basqa páter alyp berý nemese qarajatyn berý usynylǵan. Biraq Ulytaýǵa oblys mártebesin bergennen keıin baǵany qatty ósirip jiberdi. Kelip jatqan ınvestorlarǵa usynyp jatyrmyz. «Mine, jańadan qurylatyn Batys aýdanǵa áli jylý, sý, jol tartylǵan joq. Óıtkeni bas jospar áli bekitilgen joq. Odan basqa daıyn jer joq. Sol apattyq jaǵdaıda úılerdi satyp alyp, ornyna salyńyzdar degen usynys aıttyq. Astanada, Almatyda da osyndaı tájirıbe bar. Biraq ınvestorlar páter ıelerimen kelise almaı jatyr – baǵany kóterip jibergen. Bir úıde segiz páter bar. Segizi segiz túrli baǵa suraıdy. Bireýi 15 mln teńge deıdi, bireýi 20 mln teńge deıdi», - deıdi ákim.

Aımaq basshysy apattyq jaǵdaıdaǵy úılerdiń turǵyndary usynyp otyrǵan shart áleýetti ınvestorlar úshin tıimsiz ekenin aıtady.

«Sol sebepti biz syrttan kelgenderdi kóndire almadyq. Biraq arnaıy mekeme quramyz dep jatyrmyz. Apattyq jaǵdaıdaǵy úılerdi bıýdjet arqyly da alyp, ınvestorlarmen birge qaıtarymdy aqshaǵa jańa úıler salmaqshymyz. Qurylys kompanııalary keıin bıýdjetten bergen aqshany qaıtarady. Keıbir turǵyndar ýaqytsha kóshe turýǵa daıyn. Jańa úı salynǵansha páter jaldap berseńizder dep otyr. Solarmen qalaı kelisedi, birtindep-birtindep sheshemiz. Turǵyndardy da túsinýge bolady. Bári qymbattap jatqasyn kóbirek aqsha tapqysy keledi, pendeshilik qoı. Soǵan baılanysty merdigerlerdiń basyn qosyp, kelistire almaı jatqanymyzǵa bir jyl boldy. Soǵan qaramastan bıýdjetten tetigin qarastyryp otyrmyz», - deıdi Berik Ábdiǵalıuly.

Sondaı-aq, ol bul máseleniń naqty qashan sheshiletini belgisiz ekenin moıyndady.

«Ol úshin sonda arnaıy memlekettik mekeme qurýymyz kerek. Soǵan ruqsat berse, jyl aıaǵyna deıin mehanızm belgili bolady. Kelesi bir kezdeskenimizde naqty merzimin aıtarmyn. Qazir aıta almaımyn», - dedi Berik Ábdiǵalıuly.