Jezqazǵanda Jastar saraıy ashyldy
Saraı ǵımaratynda balalardy ІT tehnologııalarǵa oqytatyn tegin úıirmeler, debat klýby, sadaq atý, toǵyz qumalaq jáne shahmat sektsııalary jumys isteıdi. Sondaı-aq ǵımaratta jas jezqazǵandyqtar bos ýaqyttaryn ótkize alatyn kovorkıng-ortalyq bar.
«Jastar ortalyǵynda týǵan qalamyzdyń ıgiligi úshin kreatıvti ıdeıalar júzege asyrylyp, talantty adamdardyń jańa esimderi belgili bolady dep senemin. Jastar saraıy dıalog alańyna, mańyzdy oqıǵalar men is-sharalar ótetin orynǵa aınalýǵa tıis», – dedi qala ákimi Qaırat Ábsattarov.
Saraıda ótken alǵashqy iri is-shara Qaraǵandy oblysy men qala ákiminiń granttaryn tapsyrý boldy. Aqshalaı sertıfıkattar 17 jas kásipkerge tabystaldy.
Qala basshysy grantyn ıelengenderdiń qatarynda Danagúl Balmaǵambet te bar. Boıjetken byltyr Jezqazǵanda ońaltý jáne bilim berý ortalyǵyn ashqan.
«Men shaǵyn eki bólmeni jalǵa alyp otyrmyn, onda psıhıkalyq-sóıleý damýynyń tejelýimen aýyratyn jáne aýtıst balalarmen korrektsııalyq jumys jasaımyz. Sondaı-aq, biz mektep oqýshylary aınalysatyn bilim berý ortalyǵynyń qyzmetterin usynamyz. Shtatta 10 adam bar, onyń ishinde logopedter, psıhologtar, muǵalimder. 35–40 bala qabyldaımyz. Jalpy Jezqazǵanda ońaltý qyzmetteri óte qajet. Biraq men barlyǵyn qabyldaı almaımyn, óıtkeni bizdiń ǵımaratymyz shaǵyn jáne barlyq qajetti jabdyqtar joq. 800 myń teńge kólemindegi granttyq qarajatqa men balalarǵa arnalǵan kilemsheler, massaj kýshetkalaryn, logopedııalyq quraldar satyp alýǵa nıettimin. Bolashaqta ortalyqty keńeıtkim keledi. Problemalary bar balalar asyrap otyrǵan turmysy tómen jáne kóp balaly otbasylarǵa kómektesý josparda. Ol úshin demeýshiler tartqym keledi», – dedi Danagúl.
Oblys basshysynyń granttaryna tórt adam ıe boldy, 13 adam Jezqazǵan ákiminiń «Úzdik bıznes-joba» baıqaýynyń jeńimpazy atandy.