Jezqazǵanda qýaty 100 MVt bolatyn bý-gaz qondyrǵysy salynady

JEZQAZǴAN. QazAqparat - Keshe Jezqazǵan qalasynda «Kazakhmys Energy» JShS Bas dırektory Temirlan Ótegenov pen Ulytaý oblysynyń ákimi Berik Ábdiǵalıuly Jezqazǵan JEO alańynda qýaty ≈ 100 MVt bý-gaz qondyrǵysyn (BGQ) salý jónindegi jobany iske asyrý týraly Memorandýmǵa qol qoıdy, dep habarlaıdy QazAqparat.

Sondaı-aq, bul kúni Temirlan Ótegenov «Sinohydro» Qazaqstandaǵy ókili Lı Tengpen jáne ońtústik-shyǵys jáne Ortalyq Azııadaǵy «Sepco» korporatsııasynyń bas dırektory Ýang Gýanjongpen BGQ salý jáne qondyrǵynyń jobalyq qujattamasyn daıyndaý týraly sharttarǵa qol qoıdy.

Bul jobany iske asyrý boıynsha negizgi áriptes QHR «Sinohydro Corporation Limited» (power China kontserniniń quramyna kiretin) kompanııasy bolady. Jobany iske asyrý merzimi-2023-2026 jyldar.

Aıta ketý kerek, bul aýqymdy joba jalpy óńirdiń damýyna oń áser etedi. Máselen, BGQ obektilerin iske asyrý jáne keıinnen paıdalaný kezeńinde jańa jumys oryndary qurylady.

Paıdalaný bastalǵannan keıin qondyrǵy Jezqazǵan energııa torabynyń elektr júktemesiniń tapshylyǵyn 104 MVt-qa deıin qamtamasyz etedi, óz kezeginde bul qosymsha manevrlik qýat kúshin qosýǵa múmkindik beredi. Budan basqa, jobany engizý oblys bıýdjetine qosymsha túsimderdi júzege asyrýǵa múmkindik beredi, sondaı-aq halyqaralyq ınvestorlardy tartý boıynsha múmkindikterdi keńeıtedi.

Sonymen qatar, jańa jobany iske qosý qosymsha qýatty óndirý kezinde tabıǵı gazdyń janyp ketý sebebinen ekologııalyq jaǵdaıdyń jaqsarýyna oń áser etedi dep boljanýda.

Jobanyń jalpy quny shamamen 80 mıllıard teńgeni quraıdy.