Jezqazǵanda kólik tizginindegi bes jasar bala birneshe adamdy qaǵyp ketti

<p>JEZQAZǴAN. KAZINFORM — Jezqazǵanda kólik tizgindegen bes jasar bala jol boıyndaǵy adamdardy qaǵyp ketti. Apat saldarynan 4 adam zardap shekti. </p>

Oqıǵa «Grand Palas» meıramhanasynyń janynda bolǵan.

Apat saldarynan tórt adam zardap shekti.

Belgili bolǵandaı, kólikte otyrǵan bes jasar bala qolmen retteletin tejegishti jibere salǵan, sodan keıin kólik keri júrip, trotýarda turǵan adamdardy soqqan. 

«Fakt polıtsııada tirkeldi. Ártúrli dene jaraqatyn alǵan 4 jaıaý júrginshi aýrýhanaǵa jatqyzyldy. Tıisti saraptamalar taǵaıyndaldy», — dep habarlady Ulytaý oblystyq PD baspasóz qyzmeti.

Ulytaý oblysynyń densaýlyq saqtaý basqarmasy aýrýhanaǵa 5 adam túskenin atap ótti. Olardyń arasynda bala da bar.

«5 adam zardap shekti. Bári tiri. 1964 jyly týǵan naýqas travmatologııa bólimine jatqyzyldy. Dıagnoz — jabyq keýde jaraqaty. Sol jaq búıirdegi 4-5-6-7 qabyrǵalar ornynan jyljyp, synǵan. Oń jaq búıirinde de 4-5-6 qabyrǵalar jyljyp synǵan. Travmatıkalyq shok — 1 deńgeı. Oń jaqtaǵy postravmatıkalyq gemotoraks, sol jaqta — postravmatıkalyq pnevmotoraks. Qalǵan 1985, 1959, 1962 jyly týǵan úsh patsıenttiń bel omyrtqasy, oń jaq tobyq býyny jáne denesi kógergen. Besinshi patsıent 2018 jyly týǵan bala ambýlatorııalyq emdeýde. Dıagnoz — bastyń ústirt jaraqaty. Sol jaqtaǵy qas aımaǵynda kógergen jara bar», -dep atap ótti densaýlyq saqtaý basqarmasynyń baspasóz qyzmeti.

Bul balanyń oqıǵa kezinde kóliktiń rýlinde bolǵan-bolmaǵany ázirge anyqtalyp jatyr.