Jezqazǵanda «Qazaqmystyń» 32 jastaǵy jumysshysy bıiktikten qulap ketti

QARAǴANDY. QazAqparat - Jezqazǵannyń ortalyq aýrýhanasynda «Qazaqmys Enerdjı» JShS-ge qarasty Jezqazǵan Jylý-elektr ortalyǵynda 20 metrden astam bıiktikten qulap ketken 32 jastaǵy er adam qaıtys boldy.

Bul týraly «Qazaqmys» kompanııasynyń baspasóz qyzmetinen habarlady.

«15 qyrkúıek kúni Jezqazǵannyń ortalyq aýrýhanasynda «Inter 2030 TehServıs» merdigerlik uıymynyń 32 jastaǵy slesari qaıtys boldy. Qaıǵyly oqıǵa «Qazaqmys Enerdjı» JShS-ge qarasty Jezqazǵan Jylý-elektr ortalyǵynyń qazandyq tsehynda oryn aldy. Qazandyq agregatyn oqshaýlaý jumystaryn oryndaý kezinde ol jumys aımaǵyn óz betimen tastap ketip, 20 metrden astam bıiktikten qulap ketken. JEO densaýlyq saqtaý beketiniń dárigerleri zardap shegýshige alǵashqy medıtsınalyq járdem kórsetti. Keıin ol jedel járdem kóligimen aýrýhanaǵa jetkizildi. Alaıda, dárigerler onyń ómirin saqtap qala almady», - delingen habarlamada.

Kompanııada atap ótkendeı, qaıǵyly oqıǵanyń mán-jaıyn anyqtaý úshin arnaıy komıssııa quryldy.