Jezqazǵanda elimizde qurastyrylǵan jańa avtobýstar jolǵa shyqty

JEZQAZǴAN. QazAqparat – Jezqazǵanda qoǵamdyq kólik parki jartylaı jańardy. Saran qalasyndaǵy zaýytta qurastyrylǵan jıyrma jańa avtobýs jelige shyqty, dep habarlaıdy QazAqparat tilshisi.

Jańa avtobýstar tórt qalalyq marshrýtqa qyzmet etedi– № 1, 3, 6, 8. Jezqazǵandyqtar jańa kóliktiń jaılylyǵyna oń baǵa berdi.

«Avtobýstar zamanaýı, Saran qalasyndaǵy «QazTehna» JShS zaýytynda jasalǵan. Olar «Evro-5» standartyna sáıkes keledi, beınebaqylaýmen, pandýstardy kóterý júıelerimen, kondıtsıonerlermen jabdyqtalǵan. Bir avtobýstyń syıymdylyǵy – 51 adam», - dedi Jezqazǵan qalasynyń turǵyn úı-kommýnaldyq sharýashylyq jáne avtomobıl joldary bólimi basshysynyń orynbasary Aslan Arynov.

Jezqazǵanda barlyǵy 13 marshrýt bar – 9 qalalyq jáne 4 qala mańy.

«Bolashaqta biz qalada ONAY elektrondy jolaqy tóleý júıesin iske qosýdy josparlap otyrmyz. Barlyq jańa avtobýstar sandyq júıelermen jáne GPS-qurylǵylarmen jabdyqtalǵan. Bul City-Bus mobıldi qosymshasyn ázirleýge jáne qoldanysqa engizýge múmkindik beredi, ol arqyly turǵyndar qoǵamdyq kóliktiń qozǵalysy týraly aqparat ala alady», - deıdi Aslan Arynov.