Jezqazǵanda 7 kún adasyp júrgen balyqshylar qutqaryldy
«10 qarashada saǵat 17:00-de «Ohotzooprom»-nyń Qyzylorda fılıalynyń ınspektorlary reıd kezinde «Soldat» dala aımaǵynda Qaraǵandy jáne Qyzylorda oblystarynyń arasyndaǵy Jezqazǵan qalasynyń eki turǵyny Tarashchık Sergeı Alekseevıch (1977 j.t.) jáne Shýltsa Marına Ilgızovnamen (1977 j.t.) kezdeısoq kezdesken. Anyqtalǵanyndaı, 2 qarashada Tarashchık S. jáne Shýlts «Lada» kóligimen balyq aýlaýǵa shyǵyp ketken. Aqyry olar, qarly boranǵa tap bolyp, dalada adasyp qalǵan. Olar jeti kún boıy dalada túnep, qonys izdeýmen áýrege túsken. Biraq olar eshkimdi kezdestirmepti. Osy ýaqyt ishinde olar shuńqyrdan sý iship, birshama qınalǵan», - deıdi QR Ekologııa, geologııa jáne tabıǵı resýrstar mınıstrligi Orman sharýashylyǵy jáne janýarlar dúnıesi komıtetiniń baspasóz hatshysy Sáken Dildahmet Facebook paraqshasynda.
Joǵalǵan adamdar tabylǵan kezde «Ohotzooprom» ınspektorlary barlyq qajetti kómek kórsetken.
Inspektorlar balyqshylardyń otyryp qalǵan kóliginiń akkýmýlıatoryn qýattap, kólikterin otaldyryp, Tótenshe jaǵdaılar departamentine habar bergen.
«Olardyń týǵan-týystary izdeý jarııalaǵan. Inspektorlar olardy jaqyn aradaǵy aýylǵa aparyp, qutqarýshylarǵa tapsyrdy. Tamaq izdep júrip adasqandar avtokólikke jazba qaldyryp ta ketken», - deıdi ol.