Jezqazǵanda 5 jyl boıy «quldyqta» bolǵan balalar qutqaryldy
Onyń málimetinshe, Ulytaý oblysy ákimi Berik Ábdiǵalıuly, prokýratýra, ІІM-men atalmysh istiń mán-jaıy men qajetti sharalardy zerdelegen.
«Aqpannyń basynda oblystyq prokýratýra men qamqorshylyqtyń mobıldi toptarynyń tekserisi nátıjesinde bir otbasynan shyqqan úsh bala – 1 qyz jáne 2 ul bary anyqtaldy. Patronattyq tárbıege alǵan otbasy olardy balalar úıinen 2018 jyly alǵan. Ol kezde balalar 14, 12 jáne 8 jasta bolǵan. Balalardyń úlkenin qalaǵa 20 km qashyqtyqtaǵy óz fermasynda erkinen tys ustap, mal baǵýǵa májbúrlegen. Fermada eki tabyn jylqy men 18 sıyr bar», - dep jazdy Bala quqyqtary jónindegi ýákil.
Dınara Zákıevanyń habarlaýynsha, fermaǵa arnaıy barǵan komıssııa músheleri balalardyń qandaı jaǵdaıda ómir súrip jatqanyn kózderimen kórip, jaǵalaryn ustaǵan. Denelerinde saý tamtyq joq, kógergen, tyrtyqqa toly ekenin ańǵarǵan. Balalar júdeý, sharshańqy, ash, kir-qojalaq, kıimderi jyrtyq bolǵan. Balalardy qamqorlyǵyna alǵan ata-ana olardy qorlap, uryp, azaptap, quldaı jumsaǵany belgili boldy. Soraqysy qamqorshy 5 jyl boıy balalarǵa járdemaqy alyp kelgen.
«Balalardyń úlkeni – qyz, kolledjdi támamdaǵan, alaıda is júzinde sabaqqa múlde barmaǵan. Ortanshy ul kolledjde «oqıdy». Quqyq qorǵaý organy bilim mekemesin tekserse, ata-anasy tarapynan únemi balalardyń aýyrǵany týraly anyqtamalar usynyp otyrǵan eken. Qamqorshy qyzdy jumys istemeseń, ne shaǵymdansań, baýyrlaryńdy kórmeısiń dep qorqytqan», - delingen jazbada.
Belgili bolǵandaı, bul qamqorshy jaqynda «patronatqa alýǵa bolatyn basqa da balalar bar ma?» dep surastyrǵan eken.
«Qylmystyq is tirkeldi, saraptamalar júrgizilip jatyr. Qazir balalar qaýipsiz jerde, eń bastysy olar birge. Tıisti psıhologııalyq kómek kórsetilip jatyr. Oblys ákimi balalarǵa qolaıly jaǵdaı jasap, kómek kórsetýdi, balalardyń qaıda turatynyn, qaıda oqıtynyn jeke baqylaýyna aldy. Basynan bastap balalardyń qasynda bolǵan óńirlik ýákil Gúlmıra Alpysbaıqyzyna jáne máslıhat depýtaty Erkebulan Bodyqovqa alǵys aıtamyn», - dep habarlady Dınara Zákıeva óz jazbasynda.
Onyń málimetinshe, qazir ІІM, Prokýratýra men basqa da memlekettik organdar birlesip búkil el boıynsha pılottyq rejımde jumys isteıtin mobıldi toptar qurǵan.
«Olardyń mindeti – zorlyq-zombylyqqa ushyraǵan, ómirlik qıyn jaǵdaıdaǵy balalardy jedel túrde anyqtaý. Kóp uzamaı bul mehanızm Prezıdent tapsyrmasymen ázirlengen Balalar qaýipsizdigin qamtamasyz etý týraly zań jobasy aıasynda aldyn-alý quraly retinde zańnamalyq turǵydan bekitilmek», - dedi Bala quqyqtary jónindegi ýákil.