Jezqazǵan JEO-daǵy apat: Qala ákimi jaǵdaıdy túsindirdi

<p>Ulytaý oblysy Jezqazǵan qalasynyń ákimi Qaırat Shaıjanov Jylý elektr ortalyǵynda isten shyqqan qazandyqtardy qalpyna keltirý jaıly málimet usyndy, dep habarlaıdy <a href="https://kaz.inform.kz/" target="_blank" rel="noopener">Kazinform.</a></p>

Aıtýynsha, jumysy toqtaǵan úsh qazandyqtyń ekeýi búgin tańerteń iske qosyldy. Taǵy bir qazandyqty tún ortasyna deıin jóndeý ýáde etildi.

«Jaǵdaı turaqtandy, apatty joıý jumystary aıaqtaldy. Keshe saǵat 21:00-de №3 qazandyqty qostyq. Búgin 20 jeltoqsan, tańǵy 7.00-degi jaǵdaı boıynsha, №4 qazandyqty qostyq. Jylý jelilerindegi temperatýra rejımge sáıkes berilip jatyr.

Al búgin saǵat 00:00-ge deıin rezervke taǵy bir qazandyqty engizýdi josparlap otyrmyz. Páterlerde temperatýra kóterildi. Apat saldarynan temperatýralyq rejım 10 gradýsqa tómen boldy. 73 gradýs bolýy kerek edi, biz 63 gradýspen jiberdik. Biraq búgin tańerteń, saǵat 8:00-de 70 gradýsqa deıin kóterildi. Keshke deıin temperatýrany arttyramyz», - dedi Jezqazǵan ákimi Qaırat Shaıjanov.

Belgili bolǵandaı, eki qazandyqta tesik paıda bolyp, úshinshisinde tútin sorǵysh isten shyqqan.

«Tesik bir qazandyqtyń sý únemdegishinde anyqtaldy. Al ekinshi qazandyqta tútin sorǵysh isten shyqty. Bir tútin sorǵyshpen qazandyq jumys isteı almaıdy, sondyqtan ony toqtatýǵa májbúr boldyq. Keshe bir isten shyqqan taǵy bir qazandyqta konvektıvti jylytqyshta tesik anyqtaldy», - dep túsindirdi qala basshysy.

Qazirgi tańda Jezqazǵan jylý elektr ortalyǵynyń tozý deńgeıi 74% quraıdy.

Eske salsaq, jyl basynda "Qazaqmys" korporatsııasy qazandyqtar men týrbınalardy aǵymdaǵy jóndeýge 2,7 mlrd teńge bólgenin málim etken edi. "Tarıfti ınvestıtsııaǵa aıyrbastaý" baǵdarlamasy boıynsha qosymsha 11 mlrd teńge bólindi.

"Eki qazandyq pen bir týrbınany kúrdeli jóndeýge 11,7 mlrd teńge bólindi. Búgingi tańda jumystar jalǵasyp jatyr. Bir qazandyqty kúrdeli jóndeý aıaqtaldy. №9 qazandyq boıynsha jóndeý jumystary 15 qańtarda aıaqtalady dep kútilýde. Ótken jyly qazandyqtarǵa kúrdeli jóndeý júrgizilgen joq. Byltyrǵy jylytý maýsymyn biz qazandyqtardy aǵymdaǵy jóndeýmen ótkizdik. Al bıyl kúrdeli jóndeýden ótken eki qazandyq bar", - dedi Qaırat Shaıjanov.

Qala ákiminiń aıtýynsha, jaǵdaıdy qalypqa keltirý úshin eki jylytý maýsymy qajet.

Aıta keteıik, búgin tańerteń Energetıka mınıstrligi málimdeme taratyp, «sońǵy táýlikte keıbir oblystardaǵy jylýmen jabdyqtaý obektilerinde tehnologııalyq buzýshylyqtar tirkeldi. JEO-daǵy buzýshylyqtardy joıý úshin barlyq qajetti materıaldar, sondaı-aq personal tolyq kólemde bar», - dep atap ótti.

Eske salsaq, keshe Jezqazǵan qalasynyń JEO-da bes qazandyqtyń úsheýi isten shyqqan bolatyn. 

Ulytaý oblysynyń bas shaharynda ótken jylytý maýsymyn da tótenshe jaǵdaı oryn alǵan edi. JEO-da birden eki qazandyq isten shyǵyp, turǵyndar aıazdy kúnderi jylýsyz qaldy.