Jezqazǵan JEO-da taǵy bir qazandyq isten shyqty
Jezqazǵan jylý elektr ortalyǵynda sońǵy eki táýlikte 2 qazandyq isten shyqty. Olardyń birinshisi - № 5 qazandyq 27 qarashada jumysyn toqtatty. Al keshe túnde №6 qazandyqta apat boldy. Qazir qala turǵyndaryn jylýmen tek úsh qazandyq qamtamasyz etip otyr.
Normaǵa saı Jezqazǵandaǵy úılerde aýa temperatýrasy 22 gradýsty quraýy tıis. Apat saldarynan temperatýra 9 gradýsqa tómendep, qazir nebári 13 gradýsty quraıdy.
Turǵyndar tarapynan jylýǵa qatysty shaǵymdar osyǵan deıin de birneshe ret túsken. Olar jylytý maýsymy bastalǵannan beri páterleri jylymaǵanyn aıtyp otyr.
«Qazan aıynan bastap úıimiz bir jylyǵanyn sezbedik. Al sońǵy eki kúnde jaǵdaıymyz odan da beter qıyndady. Aıaz kúsheıip barady, al qubyrlarymyzda jylý joq. Men múgedek bolyp qalǵaly úıde otyrýǵa májbúrmin. Endi sýyq úıde oranyp-qymtanyp otyrmyn», - deıdi Jezqazǵan turǵyny Larısa Grıgoreva.
Jezqazǵandyqtar JEO-daǵy apat týraly keshe ǵana, onyń ózi BAQ arqyly bilgen. Birinshi apattan keıin bir kún ótpesten №6 qazandyq isten shyǵyp, JEO basshylyǵy onyń jumysyn da dereý toqtatýǵa májbúr bolǵan.
«Qazir 7,9,11 qazandyqtar jumys istep tur. Árıne, bul turǵyndarǵa sapaly jylý berýge jetkiliksiz ekenin túsinemiz. Jylý talapqa saı berilmeı tur. Qoldan kelgenniń bári jasalyp jatyr. Jaǵdaıdy baqylaýǵa aldyq. Jospar boıynsha, kún batqansha 6-shy qazandyqty iske qosamyz. Artynsha, 5-shi qazandyqtaǵy jóndeý jumystary aıaqtalyp qalar. Qazir jylý tasymaldaǵysh temperatýra 77 gradýs, bul normadan shamamen 9 gradýsqa tómen», - dep túsindirdi Jezqazǵan qalasy ákiminiń orynbasary Erlan Qusaıynov.
Jezqazǵan jylý elektr ortalyǵy «Qazaqmys energııasy» JShS menshiginde. Jylý kóziniń jabdyqtary 70-shi jyldary ornatylǵan. Kompanııa bıyl jańǵyrtý jumystaryna 4 mlrd teńgeden astam qarjy saldy. Aıta ketý kerek, isten shyqqan eki qazandyq ta bıyl jóndelgen. Alaıda olar alǵashqy synaqtarǵa tótep bere almady.
Kómir qoryna keletin bolsaq, bul máselege qatysty da turǵyndardyń kóptegen suraǵy bar. Jergilikti bılik habarlaǵandaı, qoımalarda 100 myń tonnadan astam kómir bar, olar tek 24 kúnge jetedi eken.