Jezqazǵan turǵyndary bir aıdan beri gaz tapshylyǵyn kórip keledi
Jezqazǵan men Sátbaev turǵyndary gaz satatyn janarmaı quıý stansalaryn bir aı boıy kúzetip keledi. Júrgizýshiler óz kólikterine gaz taba almaı álek. Demalys kúnderi janarmaı quıý stantsııalarynda kógildir otyn múldem bolmady. Búginde ol jetkizilgenimen, tek talondarmen shekteýli mólsherde berilýde.
"Bizge "gaz tek talondar arqyly beriledi" deıdi. Biraq bul talondar esh jerde joq. Biz bul talondardy qaıdan alý kerektigin bilmeımiz. Olar "Qaraǵandyǵa baryńyzdar" deıdi. Men Sátbaevtan janarmaı quıý úshin keldim. Bir saǵat boıy kezekte turmyn. Sosyn olar tek 2000 teńgege ǵana gaz beremiz dep jatyr. Bir aıdan astam ýaqyt boıy janarmaı quıý stantsııalaryn osylaı aınalyp júrmiz. "Esmunaıǵa" bardyq. Biraq olar bizdi mańyna da jolatpaıdy", - dep júrgizýshiler narazylyqtaryn bildirýde.
Oblysta gaz máselesi burynnan bar. Sebebi, suıyq otyndy saqtaýǵa oryn joq. Logıstıka da aqsap tur. Búgingi tańda oblystaǵy 25 stantsııanyń 6-aýy jabyldy. Jetkizýshilerdiń ózderi túsindirgendeı, sırek qonystanǵan aımaqta arnaıy rezervýarlar salý tıimdi emes. Al mundaı qashyqtyqqa gaz tasymaldaý tıimsiz.
Búgingi tańda aımaqqa gazdy jalǵyz kompanııa jetkizedi. Olardyń básekelesteri joq. Al óz stantsııalarynda olar suıytylǵan gazdy tek talondar arqyly beredi. Bul talondar jolaýshylar tasymalymen aınalysatyn uıymdarǵa beriledi. Qarapaıym tutynýshylar úshin kúnine 500 lıtr ǵana bólinedi.
Sonymen qatar, oblys basshylyǵy Qaraǵandydan 2 vagon gaz kele jatqanyn aıtyp, jaǵdaı erteń túzeletinine sendirdi.
"Osy jyldyń qazan aıynan bastap mınıstrlik arqyly "Es-Munaı" mekemesine 324 tonna suıytylǵan gaz bólemiz. Bul áleýmettik gaz. Búgingi tańda gazdyń baǵasy 37 tg quraıdy, janarmaı quıý stansalarynda ol 76-81 teńgeden satylady. Bul baǵytta biz jumysty kúsheıtemiz. Kelesi aıdan bastap 360 tonnadan "Es-Munaıǵa" beriletin bolady. Osylaısha biz kólemdi arttyramyz. Suıytylǵan gazdyń baǵasy janar-jaǵarmaıǵa qaraǵanda tıimdirek. Sondyqtan azamattardyń kópshiligi suıytylǵan gazdy paıdalanady. Sonymen qatar, qysta azamattar jeke úılerin gazben jylytady. Gaz qory tolyqtyrylyp jatyr", - deıdi oblys ákiminiń orynbasary Ulantaı Úsenov.
Gaz máselesin sheshý úshin aımaqqa kóbirek jetkizýshi kompanııalardy tartý qajet. Oblys basshylyǵy iri kompanııalarǵa usynys jasaǵan eken. Tipti qajetti ınfraqurylymdy qurýǵa jáne qoldaýǵa daıyn. Alaıda, shalǵaı aımaqqa eshkim kelgisi kelmeıdi. Sebebi logıstıka kúrdeli, nátıjesinde paıda bolmaıdy.