Jezqazǵan óńirinde 60 myń tonna kókónis óndiretin jylyjaı men qus fabrıkasy salynady

JEZQAZǴAN. QazAqparat – Jezqazǵan óńirinde zamanaýı jylyjaı, qus fabrıkasy, mal soıý tsehy salynyp, jańa mal sharýashylyq fermasy qurylatyn bolady. Áleýmettik jobalardy iske asyrý óńirdiń azyq-túlik naryǵyn jergilikti et jáne kókónis ónimderimen qanyqtyrýǵa múmkindik beredi. Jańa nysandardyń qurylysy esebinen 600-den astam jumys orny ashylmaq, dep habarlaıdy QazAqparat tilshisi.

Qaraǵandy oblysy Aýyl sharýashylyǵy basqarmasynyń basshysy Asqar Sanaýbarov Óńirlik kommýnıkatsııalar qyzmeti platformasynda ótken onlaın-brıfıngte Jezqazǵan óńirindegi aýyl sharýashylyǵy salasyndaǵy aldaǵy 5 jylǵa iske asyrylýy josparlanǵan jańa jobalar týraly aıtyp berdi.

«Jezqazǵanda 530 jumys ornyn quratyn eki joba júzege asyrylady. Bul qus fabrıkasynyń qurylysy. Kásiporynnyń jobalyq qýattylyǵy jylyna myń tonnaǵa deıin qus etin óndirýd kózdeıdi. Qýattylyǵy jylyna 60 myń tonnaǵa deıin kókónis ósirýge arnalǵan jylyjaı sharýashylyǵyn salý josparlanǵan», – dedi Asqar Sanaýbarov.

Sátbaev qalasynda 660 tonna kókónis saqtaıtyn jylyjaı men qus etin óńdeıtin soıý tsehy salynady. Tsehta jylyna 5 myń tonnaǵa deıin et óńdeý josparlanǵan.

Barlyǵy 55 jańa jumys orny ashylady.

«Ulytaý aýdanynda mal sharýashylyǵy salasynda úsh áleýmettik joba júzege asyrylady. Bul 23 jumys ornyn qurýǵa múmkindik beredi. Aýdanda eki mal jáne bir jem-shóp bazasy paıda bolady», – dedi Asqar Sanaýbarov.