Jezqazǵan men Sátbaevta tarıfter tómendetildi

QARAǴANDY. QazAqparat -  «Kazenergotsentr» JShS 2018 jylǵy 1 jeltoqsannan bastap Jezqazǵan jáne Sátbaevta energııamen qamtý qyzmetiniń tarıfin tómendetti. Ol jaıly aımaq basshysyna Jezqazǵan ákimi Qaırat Begimov qala aktıvi barysynda málimdedi, dep habarlaıdy Qaraǵandy oblysy ákiminiń resmı saıty.

Turǵyndar úshin tarıf 4,4%-ǵa tómendedi. Al zańdy tulǵalar úshin - 3%-ǵa. 

Qala boıynsha jalpy únemdeý aıyna shamamen 3,7-4,2 mln teńgeni quraıdy. Jylyna - 47 mln teńgege jýyq. 
Ózgerister QR Energetıka mınıstrliginiń buıryǵyna sáıkes júrgizildi. Bul qujat qýat óndirýshi kompanııalardyń shekti tarıftik deńgeılerin bekitti. 
Tarıfterdiń tómendeýi shaǵyn jáne orta bıznes úshin de oń yqpalyn tıgizedi, dep sanaıdy qala basshylyǵy. Kásipkerlikti damytý, óz kezeginde, aımaqqa tartylatyn ınvestıtsııalar kólemin ulǵaıtýǵa múmkindik beredi.

Jyl basynan beri munda saýda jáne qyzmet kórsetý salasynda jańa 28 bıznes nysandary paıda boldy. Ol jańadan 106 jumys ornyn ashýǵa múmkindik berdi. Investıtsııalardyń jalpy somasy 748 mln teńgeni qurady. 
«Bıznestiń jol kartasy-2020» baǵdarlamasy boıynsha 2018 jyly jalpy somasy 500 mln teńgeden asatyn 16 joba júzege asyrylǵan. 
Sondaı-aq «2017-2021 jyldarǵa nátıjeli jumyspen qamtý jáne jappaı kásipkerlikti damytý» baǵdarlamasy boıynsha 243 adam jańa mamandyqtardy meńgerdi. 3084 jumyssyzdar jumysqa ornalastyryldy. Áleýmettik jumys oryndaryna jáne jastar tájirıbesine 236 adam jiberildi. Aqysy tólenetin qoǵamdyq jumystarǵa 580 adam qatysty. Jalpy somasy 85 mln teńgeni quraǵan 16 shaǵyn nesıe berildi. Osylaısha, aımaqta jumyssyzdar sany 20% tómendedi.

Erlan Qoshanov Jezqazǵan jáne Sátbaev qalalarynyń ákimderine aımaqty damytý boıynsha jumystardy jalǵastyryp, memlekettik baǵdarlamalardyń oryndalýyn baqylaýda ustaýdy tapsyrdy.