Jezqazǵan kóshelerinde volonterler tegin maska taratýda

JEZQAZǴAN. QazAqparat – Jezqazǵan qalasynyń ortalyq kósheleri men avtovokzalynda eriktiler tegin masqa taratý aktsııasyn uıymdastyrdy. Qala turǵyndaryna taratylǵan betperdelerdi eriktiler men jergilikti kásipkerler qoldan tikken, dep habarlaıdy QazAqparat tilshisi.

Jezqazǵan qalasynyń Jastar resýrstyq ortalyǵyna qarasty «Jyly júrek» eriktiler uıymy koronovırýstyń aldyn alý maqsatynda shahardyń ortalyq kóshesinde eki kún qatarynan halyqqa tegin maska úlestirdi. Qorǵanysh betperdeni volonterler qajetti materıaldy satyp alyp, óz qoldarymen úı jaǵdaıynda tikti. Eki kúnde kóshedegi halyqqa, sondaı-aq az qamtylǵan, kópbalaly otbasylarǵa, muqtaj jandarǵa 600 maska tegin taratyldy. Volonterler kúnine 300 maskadan tigip, taratý ústinde. Bul aktsııa kún saıyn jalǵasýda.

Demalys kúnderi eriktiler avtovokzal mańaıynda jolaýshylarǵa, turǵyndarǵa 150 maska taratqan.

Úsh kún aralyǵynda qoldan 1 myń maska tigilgen.

Sondaı-aq jezqazǵandyq kásipker Ernar Ahmetov basshylyq etip otyrǵan «Turan» meıramhanasynyń qyzmetkerleri birneshe kúnnen beri maska tigýmen aınalysýda.

«El basyna kún týǵan sátte halyqpen birge aýyr júkti kóterýge kirisken azamatqa alǵysymyz sheksiz. Búgin saǵat 15.00-ge deıin tigilgen 150 maskany Jezqazǵan jastar resýrstyq ortalyǵynyń qyzmetkerleri men qala eriktileri bazar jaqqa shyǵyp taratty», - dep jas volonterler áleýmettik jelide alǵystaryn bildirýde.