Jezqazǵan-Qyzylorda tasjolynda 75 kólikke kómek kórsetildi

<p>JEZQAZǴAN. KAZINFORM &ndash; Kún raıynyń kúrt jylynýy saldarynan Jezqazǵan-Qyzylorda avtojolynda kólikterdiń jol júrýi qıyndady.</p>

Ulytaý oblysynyń avtokólik joldary jáne jolaýshylar tasymaly basqarmasynyń habarlaýynsha, 10 naýryzda saǵat 12-ge deıin barlyǵy 75 kólik balshyqtan shyǵarylǵan. Onyń ishinde 1 avtobýs, 10 júk kóligi jáne 36 shaǵyn avtobýs pen 28 jeńil kólikke kómek kórsetilgen. Ol kólikterde barlyǵy 350 adam, onyń ishinde 22 bala bolǵan.

Oblys ákimdiginiń habarlaýynsha, joldaǵy qutqarý jumystaryna Tótenshe jaǵdaılar departamentiniń 4 qyzmetkeri men 1 arnaıy tehnıkasy, «Qazavtojol» ulttyq kompanııasy fılıalynyń 2 qyzmetkeri men 1 tehnıkasy jumyldyrylǵan. 

Jezqazǵan-Qyzylorda tas jolynyń Ulytaý oblysy aýmaǵyndaǵy bóligin qaıta jóndeý boıynsha qazirgi tańda QR Kólik mınıstrligi tarapynan konkýrstyq rásimder ótip jatqanyn, jol jóndeý jumystary bıyl bastalatynyn eske salamyz.