Jezqazǵan qalasynda Abaıǵa eskertkish ornatyldy

JEZQAZǴAN. QazAqparat - Jezqazǵan qalasynyń «Naýryz» saıabaǵynda uly aqyn, aǵartýshy Abaı Qunanbaevqa eskertkish ornatyldy. Ashylý saltanatyna memlekettik organdardyń, mádenıet jáne bilim berý uıymdarynyń ókilderi qatysty, dep habarlaıdy QazAqparat.

Qatysýshylardy Jezqazǵan qalasynyń ákimi Qaırat Ábsattarov quttyqtady.

– Eskertkish 30 jyldyq tarıhy bar táýelsiz elge, onyń uly aqyny jáne oıshyly Abaıdyń talanty men danalyǵyna arnalǵan, – dedi qala basshysy.

Monýmentti oryndaýda sýretshi Saıd Áınekov pen músinshi Toqtar Ermekov eńbek etti. «Abaı taǵylymy» keshenine aqynnyń qola músininen basqa, qara sózderi bar bes tas plıtalar kiredi.

Saltanatty shara barysynda Abaıdyń ómiri men shyǵarmashylyǵyna arnalǵan teatrlandyrylǵan kórinister qoıylyp, óleńder oqyldy.

Sońynda qala turǵyndary men qonaqtary bıylǵy jyly jańartylǵan «Naýryz» saıabaǵyn aralap kórdi.

Abattandyrý aıasynda kireberis jańartylyp, trotýardyń bir bóligi aýystyryldy, júgirý joly paıda boldy.

Qoldanystaǵy nysandardy jańartýmen qatar «Naýryz kóje», «Dombyra» jáne «Taıqazan» shaǵyn sáýlet nysandary ornatyldy.

Qarańǵyda qala turǵyndary tórt mýzykalyq shamdy tamashalaı alady.

Sondaı-aq, saıabaqta 150 terek, qaraǵaı jáne qaraǵash kóshetteri otyrǵyzyldy.

Aldaǵy ýaqytta qala bıligi «Rýhanııat» alleıasyn salýdy josparlap otyr.

Munda Ulytaý-Jezqazǵan aımaǵynyń qalyptasýy men damýyna erekshe úles qosqan mádenıet jáne óner qaıratkerleriniń esimderimen eskertkish belgiler ornatylady.