Jetisýlyq soǵys ardageri 100 jasqa toldy
Ardagerge ıgi tilegin bildirgen M. Kólbaev oblys ákimi Beıbit Isabaevtyń qoly qoıylǵan quttyqtaý hatty mereıtoı ıesine tapsyryp, ıyǵyna shapan japty, estelik syılyqtar tabys etti. Oblys ákiminiń quttyqtaý hatynda ardagerdiń áskerı jáne kásibı eńbegi atap ótilip, týǵan jerdiń ıgiligi jolyndaǵy kóp jylǵy eńbegi úshin alǵys aıtylǵan.
«Ózińizdeı Otan aldyndaǵy áskerı boryshyn adal atqarǵan, eseli eńbektiń jemisin kórgen azamattardy biz urpaqqa árdaıym úlgi etemiz. Sizdiń erlik isterińiz, jemisti qyzmetińiz, adamı qasıetterińiz – bárimiz úshin tálimdi de taǵylymdy jol», - dep jazylǵan quttyqtaý hatynda.
Ysqaq Ábilpeıisuly 1924 jyly Kólbaı aýylynda dúnıege kelgen. Ol 18 jasynda soǵysqa óz erkimen attandy. Ýkraına maıdanynda jáne Amýr flotynyń Zenıt dıvızııasynda urysqa kirdi. Áskerı qyzmeti úshin «Áskerı-teńiz flotynyń úzdigi» ataǵyna ıe boldy. Keıin Keńes-Japon soǵysyna qatysyp, 1947 jyly elge oraldy, shańyraq kóterip, biraz ýaqyttan soń Lepsi pedagogıkalyq ýchılışesine oqýǵa tústi. Oqýdy aıaqtaǵan soń 40 jylǵa jýyq ómirin jas urpaqty tárbıeleýge arnady.
ІІ dárejeli Uly Otan soǵysy jáne Eńbek Qyzyl Tý ordenderine, Jýkov, «Eńbek eri», «Eren eńbegi úshin» medaldaryna, basqa da birqatar eleýli marapatqa ıe boldy. Halyq aǵartý isiniń ozyq qyzmetkeri, Alakól aýdanynyń Qurmetti azamaty, birqatar mektep oqýlyǵynyń avtory.
Ysqaq Ábilpeıisulynyń zaıyby Baqysh Nurataeva da uzaq jyl mektep muǵalimi boldy. Qyzy men nemeresi ózderiniń jolyn qýyp, bilim salasynda eńbek etti. Búginde ardagerdiń 9 nemeresi, 26 shóberesi, 3 shópshegi bar.
Eske salsaq, Jetisý oblysyna jasaǵan jumys sapary aıasynda Qazaqstan Qarýly Kúshteri Qurlyq áskerleri Bas qolbasshysynyń tárbıe jáne ıdeologııalyq jumys jónindegi orynbasary polkovnık Ermııan Bıatov pen Jetisý garnızonynyń áskerı qyzmetshileri, sondaı-aq Taldyqorǵan qalasynyń ákimi Ernat Bázil ardagerge arnaıy baryp, Ysqaq Ábilpeıisulyn mereıtoıymen quttyqtap qaıtqan bolatyn.
Jalpy ótken jyly Ysqaq Qusaıynovqa oblys ortalyǵyndaǵy jańa shaǵyn aýdannan bir bólmeli páterdiń kilti tabys etildi. Taǵy bir atap óterligi, 2023 jyly 8 adamǵa Jeńis kúnine oraı birjolǵy materıaldyq kómek berýge bıýdjetten 12 mıllıon teńge, ıaǵnı, ár ardagerge 1,5 mıllıon teńgeden bólindi. Sondaı-aq soǵys ardagerleri turaqty túrde sanatorııalyq-kýrorttyq emmen tegin qamtylyp, kommýnaldyq shyǵyndary óteledi.