Jetisýlyq egiz Álııa men Mánshúk: Batyr qyzdar jolymen áskerı mamandyqty tańdadyq

<p>AQTÓBE. KAZINFORM &ndash; Búgin qazaqtyń batyr qyzy, mergen, Keńes Odaǵynyń Batyry Álııa Moldaǵulovanyń týǵan kúni. Qazaq qaharmanynyń týǵanyna &ndash; 99 jyl. Al osydan eki kún buryn 23 qazanda qazaqtyń taǵy bir qaharman qyzy, pýlemetshi, Keńes Odaǵynyń Batyry Mánshúk Mámetovanyń týǵan kúni ótti. Aıtýly data qarsańynda agenttik tilshisi egiz Álııa men Mánshúk Muratqyzymen áńgilesken edi.</p>

Búgingi Álııa men Mánshúk Jetisý oblysy Alakól aýdany Úsharal qalasynyń týmasy. Qazir egiz qyz Keńes Odaǵynyń eki márte batyry Talǵat Bıgeldınov atyndaǵy Áýe qorǵanysy kúshteri Áskerı ınstıtýtynyń 1 kýrs kýrsanttary. Olar áskerı medıtsına mamandyǵyn meńgerip jatyr. 

«Biz bul mamandyqqa óz tańdaýymyzben, qalaýymyzben tústik. Jalpy áskerı mamandyqqa bala kúnimizden qyzyqtyq, oǵan sebep atamyz Ekinshi dúnıejúzilik soǵys ardageri, al ákemiz áskerı adam. Biraz, joǵary oqý oryndaryn qarap, oılana kele, batyr qyzdar jolymen áskerı medıtsına mamandyǵyn tańdadyq. Áskerı qyzmetshiler oqý-jattyǵý jáne basqa áskerı mindetterdi oryndaıdy, olardyń maqsaty – qashanda eldi qorǵaýǵa daıyn bolý. Osylaısha elimizdiń batyr qyzdarynyń jolyn bersin dep osy salany meńgerýdi uıǵardyq», - dedi Álııa Muratqyzy agenttik tilshisimen áńgime barysynda. 

Foto: Dáýlet Іztileý/Kazinform

Álııa men Mánshúktiń áskerı medıtsınany tańdaýyn ata-anasy qoldap, Jetisý óńirinen Aqtóbege oqýǵa jibergen. 

Sondaı-aq, jetisýlyq egiz esimderin kim qoıǵanyn jáne ne úshin qoıǵanyn aıtyp berdi. 

«Bizdiń esimdi anamnyń sińlisi ári kindik anamyz qoıdy. Árıne, aldymen yrymdap Álııa men Mánshikteı elim deıtin erjúrek batyr qyzdar bolsyn degen nıetpen qoıǵan. Ekinshi qyzyqty jaǵdaı, biz egiz bolsaq ta bir-birimizge uqsamaımyz, sondyqtan qazaqtyń qos batyr qyzynyń esimin tańdaǵan», - deıdi Mánshúk Muratqyzy. 

Aıta ketsek, 2025 jyly qazaqtyń batyr qyzy Álııa Moldaǵulovanyń týǵanyna 100 jyl tolady. 

Foto: Dáýlet Іztileý/Kazinform

Buǵan deıin qazaqstandyq kınogerler qazaqtyń qaharman qyzy Álııa Moldaǵulova týraly «Álııa» atty jańa kórkem fılmdi túsirýge daıyndalyp jatqanyn habarlaǵan edik. 

Á. Moldaǵulovanyń 100 jyldyǵyna jáne Jeńistiń 80 jyldyǵyna arnalǵan «Álııa» tolyqmetrajdy kórkem fılmi 2025 jyldyń mamyr aıynda jaryqqa shyǵady.