Jetisýdyń shalǵaı aýylyna ortalyqtandyrylǵan sý júıesi qosyldy

<p>TALDYQORǴAN. KAZINFORM &mdash; Jetisý oblysy Alakól aýdany Bıbaqan aýylynyń turǵyndary Konstıtýtsııa kúnin qýanyshty jańalyqpen qarsy alyp, aýylda kópten kútken ortalyqtandyrylǵan sý júıesi iske qosyldy. Buǵan deıin aýyl turǵyndary sýdy aýlalaryna ornatqan qudyqtan, tumadan alyp kelgen. Bul týraly Jetisý oblysy ákiminiń baspasóz qyzmeti málimdedi.</p>

Alakól aýdandyq ákimdiginiń málimetine qaraǵanda, buryn júz alpys turǵyny bar Bıbaqan aýylyndaǵy aýyz sý júıesi bolmaǵan. Sý júıesiniń qurylysyna bıýdjetten 245 mln. teńge qarajat bólinip, qurylys jumystary ótken jyldyń maýsym aıynda bastalǵan bolatyn. Qurylys jumystary barysynda eki uńǵyma burǵylanyp, uzyndyǵy 6 shaqyrymdy quraıtyn sý júıesi tartyldy, aýmaǵy 18 tekshe metrdi quraıtyn 6 órt sóndirý rezervýary qarastyrylǵan.

Aýyz sýdyń árbir aýla úshin qoljetimdi bolǵanyna turǵyndar dán rıza.

— Buryn sýdy aýlamyzǵa ornatqan qudyqtan alatynbyz. Baqsha sýaratyn jaz mezgilinde sý azaıyp ketetin. Sosyn únemdep qoldanýǵa májbúr boldyq. Búgin, mine, aýylǵa taza sý berilip otyr, sý taza, ári jumsaq, ekpini de qatty. Bul bizdiń turmysymyzdy qolaıly ete túsetin boldy, óıtkeni sý — eń basty tirshilik kózi, — dedi aýyl turǵyny Qapıza Hamıtova.

Jalpy Alakól aýdany boıynsha 56 eldi mekenniń 47-si aýyz sýmen qamtamasyz etilgen. Bıylǵy jyly Kóktuma, Terekti, Toqjaılaý, Ekpindi aýyldarynda aýyz sý júıesiniń qurylys jumystary bastalyp, jyl sońyna deıin aıaqtaý kózdelgen.

Jalpy Jetisý oblysynda 358 eldi mekenniń 325-i ortalyqtandyrylǵan sý júıesimen qamtylǵan, ıaǵnı bul 90,7% kórsetip otyr, al 2025 jylǵa qaraı bul kórsetkish 92,4% jetedi dep josparlanǵan.