Jetisýdyń kóshbasshy jastary marapattaldy
Dástúrge aınalǵan baıqaýǵa qatysýshylar legi de jyl saıyn artyp keledi eken. Bıyl 114 úmitker ótinish qaldyrypty. Bul joly 10 atalym boıynsha óz salasynda úzdik atanyp, kósh bastaǵan jastar anyqtalyp, oblys ákiminiń arnaıy syılyǵyna laıyq dep tanyldy. Aıta keteıik, bıyl baıqaýǵa alǵash ret «Úzdik oqýshy» atalymy engizildi.
– Memleket basshysy Qasym-Jomart Toqaev jastarmen kezdesýlerinde mańyzdy úsh baǵyt retinde tereń bilim, eńbekqorlyq pen otanshyldyq qasıetterin jıi aıtady. Rasynda da oıy ozyq, bilimi mol, adal eńbekti serik etken, kreatıvti, ınnovatsııaǵa beıim eljandy jastar – qoǵamnyń qozǵaýshy kúshi. Óńirde jastardyń laıyqty bilim alýyna, jumyspen qamtylýyna, rýhanı tárbıe máselesine úlken mán berilip, birqatar keshendi is-sharalar júzege asyrylýda. Sonyń biri – «Kóshbasshy» jastar syılyǵy. Jalpy óńirimizde 14 pen 35 jasqa deıingi 188 myńǵa jýyq jas bolsa, solardyń qatarynan 10 nomınatsııa boıynsha ártúrli salada abyroıly qyzmet etip júrgen jastar búgin úzdik atanyp otyr. Jalpy qoǵam, sonyń ishinde jastarymyz básekege qabiletti bolý úshin únemi izdeniste bolýy kerek. Jastar sózge emes, iske úıir bolsa qoǵam úshin tıgizetin paıdasy mol bolmaq. Ásirese, volonterlyqta, qoǵamdyq birlestikterde, saıası partııalar men úkimettik emes uıymdarda belsendi jastardy kórgende qýanamyz. Óıtkeni, jańarǵan Qazaqstandy qurýda azamattyq ustanymy aıqyn, óz úni, óz kózqarasy bar, otanshyl jastardyń róli zor, – dedi Jetisý oblysynyń ákimi Beıbit Isabaev.
Sonymen Jetisý oblysynyń bıylǵy «Úzdik jas kásipkeri» bolyp «Atameken» Kásipkerler palatasy Panfılov aýdandyq fılıalynyń dırektory Erlan Narynbaev, «Úzdik jas dáriger» atalymy boıynsha Panfılov aýdanaralyq kópsalaly aýrýhanasy dırektorynyń uıymdastyrý-ádistemelik jumystary jónindegi orynbasary Altynaı Kýderova, «Bilim jáne ǵylym salasynyń úzdigi» atalymy boıynsha Jetijal orta mektebiniń dırektory Ádilet Nurǵalıev, «Úzdik jas jýrnalıst» atalymy boıynsha «Jetisý» telearnasynyń shyǵarýshy-redaktory Aıaýlym Sansyzbaeva jeńimpaz atandy.
Al halyqaralyq dárejedegi «sport sheberi» Ishar Kýrbaev «Úzdik jas sportshy», Jetisý oblysynyń kásipkerlik jáne ındýstrııalyq-ınnovatsııalyq damý basqarmasy, «Jetisý» týrıstik aqparattyq ortalyǵynyń basshysy Jandos Nýrıev «Úzdik jas qoǵam belsendisi», І. Jansúgirov atyndaǵy Jetisý ýnıversıtetiniń 4 kýrs bilimgeri Araılym Jaılaýbaeva «Úzdik stýdent», Qabanbaı aýyldyq mádenıet úıiniń dırektory Erbol Aqsholakov «Mádenıet salasynyń úzdigi», Taldyqorǵan qalasynyń №4 orta mektebiniń oqýshysy Aıajan Yqsan «Úzdik oqýshy» jáne Kóksý aýdanyndaǵy Syrymovtar áýleti «Úzdik jas otbasy» atandy.