Jetisýda jyldar boıy dızel urlaǵan qylmystyq top ustaldy

<p>TALDYQORǴAN. KAZINFORM - Jetisý oblysy, Alakól aýdanynda qylmystyq top quryqtaldy. Olar birneshe jyldar boıy teplovozdardan janar- jaǵarmaı urlap kelgen. Qylmyskerler uzaq merzimge sottaldy.</p>

Kóliktegi polıtsııa departamentiniń qyzmetkerleri Bas kólik prokýratýrasy jáne «Qazaqstan temir joly» UK AQ-men birlesip, Jetisý oblysynyń Beskól stantsııasynda teplovoz mashınısterinen quralǵan qylmystyq topty quryqtady.

Tutqyndalǵandar birneshe jyl boıy poıyz dıspetcherlerimen qylmystyq kelisimge kelip, teplovozdardan janar-jaǵarmaı materıaldaryn quıyp alý arqyly dızel otynyn urlaǵan.

«Sotqa deıingi tergep-tekserý nátıjesinde qylmystyq top urlyqtyń 45 epızodynda áshkerelenip, «QTJ» UK» AQ-ǵa 16 mln teńgeden astam somaǵa zalal keltirdi. Jetisý oblysy Alakól aýdanynyń № 2 aýdandyq sotynyń úkimimen qylmyskerler uzaq merzimge sottaldy» — delingen Kóliktegi polıtsııa departamenti taratqan málimette.

Eske salaıyq buǵan deıin Jetisýda 100-den astam adam «bank qyzmetkerlerine» aldanǵanyn  jáne Jetisý oblysynda kásipker esh jerden ruqsat almaı balalar shyǵarmashylyq ortalyǵyn qurǵanyn jazǵanbyz.