Jetisýda jyl basynan beri mal urlyǵynyń 85 faktisi tirkelgen

<p>TALDYQORǴAN. KAZINFORM — Jetisý oblystyq polıtsııa departamenti óńirde mal urlyǵy azaıǵanyn málimdedi. Jyl basynan beri urlanǵan 150-den astam mal tabylyp, ıelerine qaıtarylǵan.</p>

Jyl basynan Jetisý oblysynda mal urlyǵy boıynsha 85 fakti tirkelgen. Jaýapty mamandardyń málimetinshe, bul kórsetkish ótken jylmen salystyrǵanda shamamen 37%-ǵa tómen.

Degenmen, aýylda asyrap otyrǵan malynan aıyrylyp júgen ustap qalǵandar kóp. Ákki urylar qoradan da, jaıylymnan da tórt túlikti qoldy qylady. 

— Mal urlyǵynyń ashylýyna kedergi jasaıtyn faktorlardyń bir ol — mal joǵalǵannan keıin kópshiligi óz kúshimen izdeýge tyrysady. Іzdeýmen kóp ýaqytyn ótkizip alǵannan keıin polıtsııaǵa júginedi. Polıtsııanyń atqarǵan jumystarynyń nátıjesinde Jetisýda tirkelgen mal urlyǵynyń sany 135-ten 85-ke deıin tómendedi jáne onyń ashylýy 67,4%. Jyl basynan beri barlyǵy 153 bas mal tabylyp, ıelerine qaıtaryldy, — delingen habarlamada.

Sondaı- aq, Jetisý oblysy polıtsııa departamenti mal ıelerine: maldy tańbalaý, jylqylarǵa tólqujat alý, mal qorasyn jaqsy nyǵaıtý, jaryq ornatý jáne beınebaqylaý kameralaryn ornatý, maldy uzaq ýaqyt qaraýsyz qaldyrmaý, jaıylymda ujymdyq mal jaıýdy uıymdastyrý jóninde keńes beredi.

Mal joǵalǵan jaǵdaıda oqıǵa týraly «102» nómirine qońyraý shalyp, polıtsııa qyzmetkerlerine dereý habarlaý qajet.

Eske salaıyq buǵan deıin Jetisý oblysynda 6 sıyr urlaǵan azamattyń 2 jylǵa sottalǵanyn jazǵanbyz.