Jetisýda «Zań boıynsha jer» pılottyq jobasy iske asyrylady

<p>ASTANA. KAZINFORM - Jetisý oblysynda &laquo;Zań boıynsha jer&raquo; pılottyq jobasy iske asyryla bastaıdy. Aýyl sharýashylyǵy jerlerin bólýdiń barlyq protsedýrasy tsıfrlandyrylǵan bul jobany ádildik pen ashyqtyqty qamtamasyz etý maqsatynda oblys prokýratýrasy men oblystyq jer qatynastary basqarmasy birlesip qolǵa alǵan, dep habarlaıdy Jetisý oblysy ákiminiń baspasóz qyzmeti.</p>

Memleket basshysy halyqqa arnaǵan «Ádiletti Qazaqstan: zań men tártip, ekonomıkalyq ósim, qoǵamdyq optımızm» atty bıylǵy Joldaýynda jer aýyl sharýashylyǵy salasyna ınvestıtsııa tartýdyń basty kepili ekenin jáne ony tıimdi paıdalanýdyń mańyzyn erekshe atap ótken bolatyn. 

Foto: Jetisý oblysy ákimdigi

Joba respýblıkada birinshi bolyp pılottyq rejımde aldaǵy qarasha aıynda Sarqan aýdanynda júzege asyrylmaqshy. Ol óz tıimdiligin kórsetse, kelesi jyldan bastap barlyq el aýmaǵynda iske qosylady dep josparlanǵan.

Osy rette Jetisý oblystyq jer qatynastary basqarmasynyń basshysy Ermek Ápekov pılottyq rejımdegi konkýrsty ótkizýdiń erekshelikteri týraly keńinen túsindirip berdi.

Foto: Jetisý oblysy ákimdigi

- Jergilikti jerde keminde 5 jyl turǵan azamattar men kásibin bastaǵanyna úsh jyldan aspaǵan kásipkerlerge artyqshylyq beriledi. Oǵan qosa egistik jerler úshin tehnıkalarynyń qýattylyǵy, jaıylym jerler úshin mal basynyń sany, sonyń ishinde tehnıka men maldyń keminde on eki aı buryn tirkelgendigi esepke alynady. Tipti sharýashylyqtaǵy qyzmetkerler sany, olardyń zeınetaqy men salyq aýdarymdarynyń bolýy da eskeriledi. Osynyń bárine belgili deńgeıde ball beriledi. Bul túptep kelgende aýyl sharýashylyǵyn tıimdi damytýǵa baǵyttalyp otyr, - deıdi Ermek Ápekov.

Basqarma basshysynyń aıtýynsha, elektrondy konkýrstyń ótkizilý protsesine jergilikti atqarýshy organnyń qyzmetkerleri qatyspaıdy. Jáne onda burynǵydaı ınvestıtsııa kólemi eskerilmeıdi. Oǵan qosa iri jer kóleminiń bir qolda shoǵyrlanýyna da jol bermeý qarastyrylǵan. Sondaı-aq konkýrsqa qatysýshylar túrli anyqtamalar men qujattar jınap áýrelenbeıdi, sebebi tsıfrlyq júıe Aýyl sharýashylyǵy, Ádilet, Qarjy, Eńbek jáne halyqty áleýmettik qorǵaý mınıstrlikteriniń derekter bazasymen ıntegratsııalanǵan.

Foto: Jetisý oblysy ákimdigi

Qazirgi qoldanystaǵy konkýrs tikeleı komıssııa músheleriniń qatysýymen, ıaǵnı adam qolymen atqarylatyndyqtan, onda jemqorlyq táýekelderi joq deı almaımyz deıdi oblystyq prokýratýra ókilderi. Olar taldaý barysynda aýyl sharýashylyǵy jerlerin bólý máselesi qoǵamda jıi kóteriletinin anyqtaǵan.

- Bul oraıda biz jer qatynastary basqarmasymen birigip, konkýrs ótkizýdiń tsıfrlyq júıesi jobasyna kiristik. Bul jerdi bólýdiń eskirgen tásilinen bas tartyp, ony tolyq avtomattandyrýǵa qol jetkizýge baǵyttalǵan. Konkýrsqa reıtıngtik-baldyq júıe engizilip, onyń qorytyndysy adamnyń qatysýynsyz birden jarııalanady. Bul engizilgen jańashyldyqtar jemqorlyqtyń aldyn alýǵa, bıznesin jańa bastaǵan jáne áleýmettik baǵyttaǵy kásipkerlerdi qoldaýǵa, bıznes ókilderiniń óz isin ashyq júrgizýin yntalandyrýǵa, sharýa qojalyqtarynda isteıtin jumysshylardyń quqyǵyn qorǵaýǵa oń yqpaly tıgizedi degen senimimiz bar, - dedi oblys prokýratýrasynyń Qoǵamdyq múddelerdi qorǵaý basqarmasy bastyǵynyń orynbasary Bekzat Erýzakov.

Atap ótsek, Jer kodeksine sáıkes oblysta nysanaly maqsaty men paıdalanylý rejımi boıynsha jer aýmaǵy 7 sanatqa tolyqqandy bólingen alǵashqy aımaq Sarqan aýdany bolǵandyqtan, pılottyq jobaǵa qatysýshy retinde tańdalynyp otyr. Jerdi aýmaqtarǵa bólý qazir taǵy 4 aýdanda – Aqsý, Kóksý, Eskeldi, Kerbulaq aýdandarynda júrgizilip jatyr.

Jalpy Jetisý oblysynda bıylǵy jyldyń basynan beri jer bólýge qatysty 28 konkýrs ótkizilgen. Oǵan 659 adam qatysyp, olarǵa 84 myń gektardan astam jer bólinip berildi.