Jetisýda medbıke naýqastardyń atynan 6 mln teńgege jýyq nesıe rásimdegen

<p>TALDYQORǴAN. KAZINFORM — Kóksý aýdandyq ortalyq aýrýhanasynyń medbıkesi ózine qarasty ýchaskede esepte turǵan Balpyq bı aýyly Shadrın yqshamaýdany turǵyndarynyń atynan taýarlyq nesıe rásimdegen. Medıtsına mamanynyń onshaqty adamnyń atynan 6 mln teńgege jýyq kredıt alǵany dáleldendi. </p>

Medbıke 67 jastaǵy Múnıra Qatashtyń úıine baryp, qan qysymyn, qant dıabetin tekserip júrgen. Zeınetkerdiń aıtýynsha, «jumysqa esep beremin» dep uıaly telefonyna sýretke túsirýge ruqsat suraǵan.

Esh oılanbastan kelisimin bergen zeınetkerge biraz ýaqyt ótken soń bank qyzmetkerleri habarlasyp nesıesin tóleýdi talap etken.

— Baıan degen meıirbıkege qalaı aldanyp qalǵanymdy bilmeımin. Otadan keıin tósegimde jatqanmyn, meni sýretke túsirip alyp ketipti. Bir kúni kredıtiń bar dep bankten habarlasty. Ózim onkologııamen aýyram. Eki balam qaıtys bolǵan. Osy úıde jesir kelinim bar, jetim balalarym bar. Eshteńem joq. Jalǵyzbasty anamyn. Meni aldap 500 myń teńge kredıt alyp ketipti. Aı saıyn 40 myń teńge tóleýim kerek. Ony men nemen tóleımin? Sot qalaı úkim shyǵaryp otyr? , — deıdi Múnıra Qatash.

Medbıkege aldanǵandar — zeınetkerler men múgedek jandar. Nesıe olardyń atyna sáýir, mamyr aılarynda rásimdelgen. 8 adamnyń árqaısysynan 500 myńnan bastap mıllıon teńgege deıin alǵan.

Foto: Aıbek Quttybek/Kazinform

— Ábden senimge kirdi. 28 mamyr kúni úıime kelip, sizdi osy jerge tirkeýge qoıý úshin sýretke túsirip alýym kerek, qujatyńyzdy berińiz dep aty-jónimdi, bárin jazyp alyp ketti. Oıymda eshteńe joq, sodan eki aıdan soń «Hoým kredıt bank» habarlasyp, «qaryzyńyzdy qashan tóleısiz» dep tur. Ne kredıt dep banktegi qyzben sózge kelip qaldym. Keıinnen meniń bank shotymdy buǵattap tastady. Jalaqymdy ala almaı júrmin. Mine, osyndaı jaǵdaı. Ózimiz tólep otyrmyz, -deıdi Muhamedjan Qońqashev.

Alaıaqqa aldanǵandar jınalyp quzyrly organǵa aryzdanǵan. Kóksý aýdandyq soty 1983 jylǵy azamatshany QK 190-babynyń 1-bóligimen kináli dep tanyǵan. 3 jyl 6 aıǵa bas bostandyǵyn shekteý jazasyn taǵaıyndap, materıaldyq shyǵyndy óteý mindettelgen.

2024 jylǵy 11 qyrkúıektegi úkimde bylaı delingen: 

«Sottalǵan S. B.J. bas bostandyǵy shektelgen búkil merzim ishinde probatsııalyq baqylaýda bolady. Ol sottalǵan adamnyń minez-qulqyn júzege asyratyn ýákiletti memlekettik organǵa habarlamaı, hturǵylyqty jerin, jumysyn aýystyrmaýǵa tıis. Sondaı-aq turǵylyqty jeri boıynsha ákimshilik-aýmaqtyq birlik sheginen tys jerge ketpeýi kerek».

Jábirlenýshiler sot sheshiminiń eshqandaı paıdasy bolmady deıdi. Sebebi, barlyǵy nesıesin ózderi tólep otyr. Al zańgerler zeınetkerler bankpen nesıe kelisimshartynyń kúshin joıý týraly talap-aryz bermegenin, sondyqtan másele sheshilmeı qalǵanyn aıtady.

— Mundaı jaǵdaıda azamattyq talap boıynsha mámileni jaramsyz dep berý kerek edi, sottyń úkimi osyǵan negiz bolatyn edi. Sottalýshydan aqshany óndirip alý týraly sheshim shyqqan, endi tek qana sheshimniń oryndalýy. Sot oryndaýshylarmen sheshimniń oryndalýyna jumys jasaý kerek, -deıdi Jetisý oblystyq advokattar alqasynyń advokaty Erkin Ońǵarbaev.

Sottalýshy medbıke qazir jumyssyz. Al shyǵyndy óndirip alatyndaı onyń atynda eshqandaı dúnıe-múlki joq.

Zańgerler endi aldanǵan azamattar sotqa appelıatsııalyq shaǵymnyń merzimin qalpyna keltirý týraly aryz jazyp, odan ári nesıe kelisimshartynyń kúshin joıý týraly talap-aryz qoıýýyna bolatynyn aıtady.

Eske salaıyq buǵan deıin Jetisý oblysynda aýyl turǵyndary egistik jer ala almaı otyrǵanyn jazǵanbyz.