Jetisýda aýyl ákimderi múgedekter men kópbalaly analardyń jalaqysynan zańsyz jarna alǵan
Oblystyq prokýratýranyń dereginshe aýyldyq okrýg ákimderi men mektep dırektorlary múgedektigi bar adamdardyń, kópbalaly analardyń, «Altyn alqa», «Kúmis alqa», «Ana dańqy» jáne basqa da marapatqa ıe bolǵan analardyń jalaqysynan mindetti tólem somasyn zańsyz ustap otyrǵan.
Keıbir jumys berýshiler Mindetti áleýmettik medıtsınalyq saqtandyrý týraly zańnyń talaptaryna sáıkes azamattardyń atalǵan sanaty úshin jarnany memleket tóleıtinin eskermegen.
Nátıjesinde qoldaýǵa muqtaj 166 azamattan zańsyz ustalǵan qarjy mólsheri 5 jarym mln teńgeden asqan.
«Jetisý oblysy prokýratýrasynyń qadaǵalaý aktisi boıynsha atalǵan azamattardyń buzylǵan quqyqtary qalpyna keltirilip, zańsyz ustalǵan qarjyny qaıtarý rásimi bastaldy. Kináli laýazymdy tulǵalar, onyń ishinde eki aýyldyq okrýgtiń ákimi men bir mektep dırektory tártiptik jaýapkershilikke tartyldy» — delingen habarlamada.
Eske salaıyq buǵan deıin Jetisý oblysynda 4,5 mlrd teńge jymqyrǵan esepshiler isi: eki fıgýranttyń jazasy jeńildegenin jáne múgedektigi bar balalardyń ata-analarynan zańsyz ustalǵan salyqtyń qaıtarylǵanyn jazǵanbyz.