Jetisýda aýdıt teksergen memlekettik satyp alýdyń 92%-ynan kemshilik anyqtaldy

<p>TALDYQORǴAN. KAZINFORM — Jetisý oblysynda memlekettik organdar jalpy somasy 1 mlrd 800 mln teńgedeı bolatyn 51 satyp alýda túrli zańbuzýshylyq jasaǵan. Basym bóliginde satyp alatyn taýar men qyzmettiń qunyn qymbatqa baǵalaý jaǵdaılary bolǵan.</p>

Bıyl 10 aıda memlekettik aýdıt 11 mlrd 413 mln teńgeniń maqsatty jumsalýyn teksergen.

Departament mamandary 1 mlrd 440 mln teńge qarjylyq jáne 6 mlrd 192 mln teńgege rásimdik sıpattaǵy kemshilikter anyqtalǵanyn málimdedi.

 Anyqtalǵan qarjylyq buzýshylyqtardyń 589 mlnǵa jýyq teńgesi bıýdjetke qaıtarýǵa jatady. 92 mln teńge bıýdjet kirisine qaıtaryldy.

— Júrgizilgen aýdıtorlyq is-sharalardyń qorytyndylary boıynsha anyqtalǵan buzýshylyqtardy joıý jáne olarǵa jol bergen laýazymdy tulǵalardyń jaýapkershiligin qaraý maqsatynda aýdıt obektilerine 80 nusqama jiberildi, onyń ishinde: 60 nusqama tolyǵymen oryndaldy, 5 nusqamanyń oryndalý merzimi jetken joq, qalǵan 15 nusqamanyń 4-eýi boıynsha qylmystyq is qozǵaldy, 11-i boıynsha materıaldar sotta qaralyp jatyr, — deıdi Jetisý oblysy boıynsha ishki memlekettik aýdıt departamenti.

Jalpy, Jetisý oblysy boıynsha ishki memlekettik aýdıt departamenti jyl basynan beri 82 aýdıtorlyq tekseris júrgizgen.

Zańbuzýshylyqqa jol bergen 66 laýazymdy tulǵa tártiptik jaýapkershilikke tartylyp, 2 qyzmetker laýazymynan bosatyldy. 

Eske salaıyq, osyǵan deıin 4,5 mlrd teńge jymqyrǵan esepshiler isi jaıynda habarlaǵan bolatynbyz.