Jetisý oblysynyń joldary qys mezgiline qanshalyqty daıyn

<p>TALDYQORǴAN. KAZINFORM — Jetisý oblysyndaǵy avtomobıl joldarynyń jalpy uzyndyǵy 3 988 shaqyrym. Onyń 1 034 shaqyrymy respýblıkalyq, 2 954 shaqyrymy jergilikti mańyzy bar joldar. </p>

Qys aılarynda oblystyq avtomobıl joldary men eldi mekenderdiń ishki kóshelerine qysqy kútip ustaý jáne ondaǵy jol qaýipsizdigin qamtamasyz etý úshin 66 merdiger mekeme daıyn.

Oblystyq jolaýshylar tasymaldaý jáne avtokólik joldary basqarmasynyń málimetinshe, 2024 jyly oblystyq joldar men eldi meken kósheleriniń qysqy kútip ustaý jumystaryna 867,5 mln teńge qarastyrylǵan. Taıǵaqqa qarsy 7936 tonna materıal, qar tazalaýǵa 448 arnaıy tehnıka men 405 tonna janar-jaǵar maı daıyndalǵan.

Foto: Jetisý oblysy ákiminiń baspasóz qyzmeti

— Oblys aýmaǵynda qar basatyn 12 aımaq bar. Onyń ekeýi respýblıkalyq, 10-y oblystyq mańyzy bar aımaqtar. Qar kóshkini, aıazdy kúnderge, sondaı-aq jol-kólik apattary men tótenshe jaǵdaılarǵa 21 statsıonarlyq jáne 8 jyljymaly jylytý pýnktteri vahtalyq avtobýstar bazasynda daıyndaldy. Apattyq-qutqarý jumystaryn júrgizý úshin avtomobıl joldarynyń neǵurlym qar basatyn aımaqtary bar aýdandarda órt sóndirý jáne qutqarý bólimshelerine 45 birlik tehnıka bekitildi. Barlyq órt sóndirý jáne qutqarý bólimsheleri aldaǵy sýyq mezgilde úzdiksiz jumys isteýge daıyn, — dedi Jetisý oblystyq Tótenshe jaǵdaılar departamenti.

Respýblıkalyq jáne oblystyq mańyzy bar joldardyń neǵurlym qaýipti aımaqtarynda aýa raıy kúrt nasharlaǵan kezde ózara is-qımyl jasaý maqsatynda kúshter men quraldardyń áreket etýi, zardap shekkenderdi qutqarý jáne evakýatsııalaý, tamaqpen jáne janar-jaǵarmaımen qamtamasyz etý máseleleri qaralǵan. Shtabtyq jattyǵýǵa polıtsııa departamenti, «QazAvtoJol» UK» AQ fılıaly, Jolaýshylar kóligi jáne avtomobıl joldary basqarmasy men TJD qatysty.

Eske salaıyq, buǵan deıin Jetisý oblysynda Latvııa azamattary taýǵa saıahatqa shyǵyp, adasyp ketkeni týraly jazǵanbyz.