Jetisý oblysynyń jylytý maýsymyna bólingen qarjy qalaı ıgerilip jatyr

<p>Bıyl Jetisý oblysynyń jylytý maýsymyna 10,9 mlrd teńge bólingen. Bul qarjyǵa óńirdegi jylýmen jabdyqtaý nysandaryn jóndeý jáne otyn satyp alý shyǵyndary kiredi, dep habarlaıdy <a href="Kazinform" target="_blank" rel="noopener">Kazinform</a>.</p>

Oblystyq energetıka jáne turǵyn úı-kommýnaldyq sharýashylyǵy basqarmasynyń esebi boıynsha osy jylytý maýsymynda energııa kásiporyndary úshin 365 myń tonna kómir, 10,1 myń tonna mazýt qajet. Onyń ishinde 83,5 myń tonna kómir men 4,1 myń tonna mazýt satyp alýǵa bıýdjetten 1,8 mlrd teńge bólingen.

Sondaı-aq, bıýdjettik uıymdarǵa 10,7 mln lıtr dızel otynyn, 4,2 myń tonna túıirshik otyn jáne 15,4 myń tonna kómir daıyndaýǵa 5,4 mlrd teńge jumsalady. Al jeke turǵyn úılerdiń kómirge degen suranysy 453,5 myń tonna shamasynda eken. Qatty otyn tapshylyǵyn boldyrmaý úshin jaz aılarynda 236,8 myń tonna Shubarkól kómiri men 216,7 myń tonna Qarajyra kómirin satyp alýǵa tapsyrys berilgen.

Sondaı-aq, bıyl oblysta 5 jylýmen jabdyqtaý nysanyn qaıta jańartýǵa, salýǵa jáne aǵymdaǵy jóndeýge bıýdjetten 3,7 mlrd.teńge bólingen. Onyń ishinde byltyr aıaq asty apatty jaǵdaı týyndap, turǵyndardy jylýsyz qaldyrǵan Taldyqorǵan qalasyndaǵy №4 qazandyqty gazben jylytýǵa aýystyrýdy aıaqtaý jáne shaǵyn aýdandardyń jylý jelilerin rekonstrýktsııalaý birinshi kezekte atqarylǵan.

Jalpy Jetisý óńiriniń qysy qysqa ári jaıly bolǵanymen, aıaq asty kúsheıetin qytymyr aıazdyń turǵyndardy ábirge salatyny bar. Sol sebepten de atqarýshy bılik turǵyndardy qajetti kómir qoryn satyp alýǵa úndep otyr.

Búginde oblystaǵy 38 kómir tuıyǵy men qoımasynda kómir saýdasy qyzyp tur. Bul tuıyqtar men qoımalarda 27,5 myń tonnasy bar.

Al kómirdiń ortasha baǵasy 17 200-18 300 teńge aralyǵynda. Mysaly, Shubarkól kómiriniń ár tonnasy 18 300 teńge bolsa, Qarajyra kómiriniń tonnasy 17 200 teńgeden satylyp jatyr. Buǵan tasymal saýdasy kirmeıdi. Derek boıynsha, qala ishi men jaqyn aýyldarǵa kólikpen tasymaldaý quny 10 000 - 15 000 teńge shamasynda. Al temir jol qatynasy joq aýdandarda kómir baǵasy ushyp tur. Atap aıtqanda, Aqsý jáne Sarqan aýdandarynyń turǵyndary kómirdiń ár tonnasy úshin 25 000 - 26 500 teńgege shyǵyndalady.

Al oblys ortalyǵynan tysqary jatqan Panfılov aýdanynyń turǵyndaryna qajetti qatty otyn Altynkól jáne Qundyzdy stantsııalaryndaǵy temir jol tuıyqtary arqyly jetkiziledi. Ár tonnasy 18 800-18 850 teńgeden satylymda.

«Aýdan turǵyndary úshin qatty otynnyń qajetti mólsheri 52,0 myń tonna shamasynda. Búginde 28 561 tonna kómir ákelindi. Qajetti otyn kúndelikti tasymaldanyp jatyr. Áleýmettik nysandarǵa qajet suıyq otynnyń 80,7% tıisti mekemelerge jetkizildi. Al bilim berý nysandary 1 479 158 lıtr suıyq otynmen tolyq qamtyldy. Densaýlyq saqtaý nysandary 463 myń lıtrdiń 243 myń lıtrin, al mádenıet nysandary 82 076 lıtrdiń 57 076 lıtr suıyq otynyn qazan aıynyń alǵashqy aptasyna deıin daıyndap aldy», - deıdi Panfılov aýdany ákimdigi kommýnaldyq sharýashylyq bóliminiń basshysy Arǵyn Saýryqov.