Jetisý oblysynyń Tekeli qalasyna gaz berile bastady
Mundaǵy «Dostyq» shaǵyn aýdanynyń turǵyndary kógildir otynǵa birinshi bolyp qosylýda, atap ótsek, bul shaǵyn aýdanda 1200 abonent bar. Jalpy Tekelini gazdandyrý jobasy bıyl tolyǵymen aıaqtalady, qalanyń shaǵyn aýdandary gazǵa kezeń-kezeńimen qosylady.
Tekeli qalasynda alǵashqylardyń biri bolyp Kúnshyǵys kóshesindegi № 215 úıdiń turǵyndary gazben jabdyqtaý júıesine qosyldy.
— Jasym 73-te, men osy qalada dúnıege keldim. Qazir egde tarttym sondyqtan kómir tasyp, ot jaǵý, kúl shyǵarý maǵan ońaı emes. Biz gazdy asyǵa kúttik. Búgin, mine, kópten kútken armanymyz oryndaldy, — dep qýanyshyn jetkizdi Lıýdmıla Proskýrıakova.
Búgin tekeliliktermen birge tabıǵı gazǵa Eskeldi jáne Qaratal aýdandarynyń birneshe aýylynyń turǵyndary da qol jetkizdi. Kógildir otyn jalpy 1700-den astam adam turatyn Ótenaı, Jańalyq jáne Ortatóbe aýyldaryna berildi.
— Eskeldi aýdanynda 33 eldi mekenniń 21-i gazdandyrýǵa jatady. Onyń 10-y búginde gazdandyryldy, 9 eldi mekende gaz taratý jelilerin salý jumystary júrgizilýde. Sondaı-aq Qaınarly aýylyna gaz taratý jelileriniń qurylys-montajdaý jumystarynyń konkýrstyq protsedýralary aıaqtaldy. Jalǵyzaǵash aýylyn gazben qamtý boıynsha jobalyq jumystar júrgizilýde. Sonyń nátıjesinde 2025 jyly atalǵan barlyq jobalar iske asyrylǵannan keıin aýdan 100% gazdandyrylady, — dedi aýdan ákiminiń orynbasary Aıdyn Isabekov.
Qaratal aýdany týraly aıtatyn bolsaq, búgingi kúni Kókdala, Dostyq, Qanabek, Jańatalap, Kálpe, Oıan, Bastóbe, Ortatóbe aýyldarynda gaz taratý jelileriniń qurylysy aıaqtaldy. Úshtóbe qalasy turǵyndarynyń 40%-y nemese qalanyń batys bóliginiń 8 myńnan astam turǵyny kógildir otynǵa qol jetkizdi.
Jyl sońyna deıin 11 myńǵa jýyq adam turatyn qalanyń qalǵan shyǵys bóligin de gazben qamtý josparlanǵan. Sonymen qatar aýdannyń 5 aýylynda gazdandyrý jumystary júrgizilýde. Bul eldi mekenderdi gazǵa qosý jyl sońyna deıin kezeń-kezeńimen júzege asyrylady dep mejelengen. Jalpy Qaratal aýdany da 2025 jyldyń sońyna deıin tolyq gazdandyrylady.